Pakkin Leung

Pakkin。《Breakazine!》前總編輯,blogger。入行做編輯時,仍是用rubber cement貼稿的年代。歷任書籍編輯、網站監製、雜誌編輯等職務。愛看書,愛攝影,愛動漫。

神係你嘅大靠山──廣東話意譯〈詩篇〉62篇

2008年5月12日,汶川一帶地震,好多人被偷工減料的倒塌建築活埋壓死。兩、三年後我到過其中一間重建的學校幫過一陣手,也到過整個市鎮被摧毀的北川舊城遺址。

很難用言語來描述那種震撼。那些支柱像豆腐渣一般的大樓,整幢倒下;比較堅固的大樓,只斷最底一層,垂直壓下來,三樓變二樓,二樓變地下。而這些過去曾被認為穩妥的建築,在保固支架的支撐下,仍然以10米、20米的身姿,矗立在我面前。

IMG_0969

那時我記起,在地震一周年時,我曾譯過一篇詩篇。說的是人間的不可靠,說的是善良的人在墮落世界如何四面受敵,而上帝如何成為我們的靠山。

願我們都得著平安。

【詩篇62篇】
廣東話意譯本(參The Message
 
神,我唯一嘅靠山,我會放長雙眼等佢點講。
我既然乜都要靠佢救我,我緊係要睇佢頭。
佢成日都勁撐我,
又畀個位我透吓氣,
好似舊大石頭咁靠得住。
咁大個靠山,
我預咗成世跟實佢。
 
你哋成日圍埋兇我,仲要兇到幾時?
你哋成日恰我,仲要恰到幾時?
你哋趁火打劫、乘機抽水,
鬥唔過人,就專搞小動作跣人一鑊,
個個笑裡藏刀,睇我幾時死。
 
神,我唯一嘅靠山,我會放長雙眼等佢點講。
我將來乜都旨意佢,我緊係要睇佢頭。
佢成日都勁撐我,
又畀個位我透吓氣,
好似舊大石頭咁靠得住。
佢會救我,同我爭番啖氣,趕走班衰人,成世照住我。
 
你哋都係,咁嘅大靠山,梗係要搵佢幫你哋。
有乜嘢頂唔順都可以同佢呻,佢實會照住你哋。
 
記住:班友根本冇料到,唔理佢出身係點,都係冇料到。
冇料到,幾多個夾埋都係冇料到,撞兩撞就散。
但係你都唔好咁得戚,唔好作威作福,
就算畀你有甜頭,都唔好開心得咁早。
 
神,你個靠山,講咗一次,我都聽過唔止一次,連聾嘅都聽到:
呢個世界只得佢靠得住。
嘩,大靠山,錫晒你,有你照住真係好!
因為你夠公道,壓得住個場,可以主持大局。

Pakkin
http://pakkin.blogspot.hk

留下回應

你的電郵地址不會被公開。 * 為必須填寫欄目

你可使用以下HTML標簽及屬性: <a href="" title="" rel=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

留下回應

贊助連結
鄒永恒:教、學、人生

 

 

精選文章