教牧你別要慌

到不同的群組、留言區觀察,發現教牧很多都處於一種狀態-- 態度上支持抗爭,但係好驚。

  • 驚年青人受傷。
  • 驚年青人輕生。
  • 驚年青人被捕。
  • 驚中共出解放軍。
  • 驚香港亂。

除了各式恐懼,還有各式不知道。

  • 唔知點牧養。
  • 唔知點宣講。
  • 唔知點支援。
  • 唔知未來點。
  • 唔知點收科。
  • 唔知自己做緊乜。

我先由結論講起。你的恐懼來自無知,無知令你驚,一驚就牧養唔到。我唔係講緊而家牧養唔到,而係你以後都唔會牧養到上過前線的人。我是用常識來幫大家「收驚」的。 關於前線。 前線其實沒有想像中那麼緊張,上過前線就知道,現場有八成時間都係行行企企。新聞將最激烈的場面剪接出來,你看新聞就會覺得整件事都係咁。睇 live 睇得耐,你都會知道,大部分時間其實無咩好睇。所以呢,第一要緊的,是親身落前線,吸收經驗。唔係叫你打,前線其實好需要充人數,所以你去和理非其實冇問題,只要唔好礙事就得。有咩喺現場係礙事嘅呢?

  • 阻住前線做嘢
  • 勸退
  • 同警察講道理
  • 說教
  • 掛住影相

所以,如果你係新手,落到去冷靜地成為人群一部分就得。唔好多多諗法。當然你有經驗或者知點做咪做囉。總之唔好多多動作做人做嘢啦。大部分抗爭者都會同意,上過前線比差佬打過個人就會醒。我唔希望你俾差佬打,但係你落下場,個人就已經唔同咗架啦。同埋,我奉勸你一句,唔好以為人哋會尊重你係傳道人。前線唔係你教會,無人care你蒙召乜乜乜,牧會經驗乜乜。你落到去係 no body,每個人都係 no body。你要成為 no body。基本上就算你去和理非,隱身份係基本。遮面係基本,衣服方便走動係常識。去過你就唔會咁驚架啦。

其次係要幫大家理解一下,抗爭者點睇依家嘅大局。 我明白大部份教牧都係和平主義者,出去係希望「表達訴求」「發出聲音」。OK,我可以尊重,我諗大部份抗爭者都唔介意有人係咁。但係,你要明白現場其實諗緊咩。我唔係要你同意,而係要你明白。 所謂抗爭,就係增加政府管治成本。這是最最最基本的理解。所以你要明白,抗爭就係要令政府難以管治。所以,當你見到啲人返唔到工呀,交通擠塞呀,呢啲係香港嘅陣痛,麻煩大家唔好再「各大五十大板」。試試站在抗爭者的角度去幫手解釋。教牧講一句,好過其他人講十句。 拜託唔好再話政府「漠視民意」呀,話警察「失去良知」呢啲。呢啲已經係常識,呼天搶地講常識係一件好冇水準,好令人覺得你離地嘅事。拜託各位主內傳道唔好比人覺得你咁離地。

而家嘅抗爭心態,係持續施壓,直到政府投降。你會諗「嘩,有咩可能呀?共產黨乜乜乜呀,香港人遊行做三十年都唔得啦blah blah blah」六月九日之前,好多人都覺得「逃犯條例修訂」一定會強行通過,但你睇下而家?你無成功過,唔等於其他人唔會成功。而家香港人就係突破咗三十年來都唔得嘅方式,追求間一路而來我哋應該有嘅嘢。所以,失敗主義已經失敗,香港人正進入抗爭新紀元。 簡單來說,香港嘅抗爭者已經唔係諗緊「向政府表達訴求」而係「你哋死開,比番個普選我哋」。呢一點一定要跟到呀,跟唔到真係無計傾。 關於唔知點。 其實都係因為無知,所以你先唔知點。上前線啦,出一出去就可以快速擺脫無知。同埋,唔知嘅嘢,唔講會比較好。所以,如果你唔知點講道,唔知點牧養,你咪唔好講時事囉。唔識講唔講,點都好過亂講。

如果你同唔到你教會有上前線的人講同一種語言,你將會永遠失去他們。他們的信仰生活,將會由其他人聽得明他們的人接收。你諗下,萬一佢去咗陳到嘅教會,就唔好啦。所以,為咗佢哋嘅生命,你去下前線真係基本要求。你唔去,就有人會去。第時你返天家,上帝問起,你都幾難答。 親愛的同工,唔好慌,而家無論抗爭同牧養,其實都形勢大好。去啦。

留下回應

贊助連結
marksir 聖經考古

 

 

精選文章