Pakkin Leung

Pakkin。《Breakazine!》前總編輯,blogger。入行做編輯時,仍是用rubber cement貼稿的年代。歷任書籍編輯、網站監製、雜誌編輯等職務。愛看書,愛攝影,愛動漫。

門訓,係要堅做囉──廣東話意譯〈雅各書〉1:22-27

-100%+

jesusable007

有一個印象,不知對不對。近十年八載,教會十分強調門徒訓練。為什麼會有這樣的強調呢,可以想像,就是因為教會裏有太多人,返教會返了好久,但整個人的生命就只是多了一項叫返教會的活動,所以漸漸有了所謂基督徒與基督的門徒之分,彷彿做門徒是做基督徒的進階版;那些生命目標沒有對準天國、行事為人衰過街邊路人的,就先做住基督徒吧。有恩典有憐憫的意思,就是成世人掛住基督徒個名都無所謂吧?做門徒好辛苦,唔好搞我好冇?

或者有人會說,搞下門徒訓練,至少有些人認真一些,都好吖。不過有時我們也許太受公開試考評的思維影響,太過以完成課程為目標,以為一年讀完整本聖經就是成就,以為試過去通宵祈禱會就夠堅持,以為去敬拜特會唱足企足兩個鐘就係虔誠愛主,以為課程達標完成畢業就真是生命有改變。

記得神學院畢業照拍攝那天,教務長在人堆中跟我們這些穿着畢業袍的學生說:「乜你哋真係覺得畢咗業喇?」老師素常字字珠璣,講笑串人都要塞錢入你袋,這句說話我到今天都牢牢記住。係囉,信仰有得畢業嘅咩?你真係以為自己識晒?《聖經》跟《易經》有一個相似之處,就是隨着年紀不同,人生體會加深,看見的風景就有分別。門訓不是不好,而是,如果我們不明白世情,對世界所深陷的困境無知,《聖經》就會淪為給小朋友的德育教訓,門訓的內容和操練就搔不着癢處;然後我們就會挖些無無謂謂的事情來虛應《聖經》人物的遭遇,穿鑿附會一番。

就如彼得說到的試煉和喜樂:「你們這因信蒙神能力保守的人,必能得著所預備、到末世要顯現的救恩。 因此,你們是大有喜樂;但如今,在百般的試煉中暫時憂愁, 叫你們的信心既被試驗,就比那被火試驗仍然能壞的金子更顯寶貴,可以在耶穌基督顯現的時候得著稱讚、榮耀、尊貴。」(〈彼得前書〉1:5-7

這喜樂不是要人操練到,就算明明不開心都要能笑得出那麼變態和扭曲,而是在說人在種種逼迫中,因為堅信耶穌基督最後一定會「逆轉勝」,而自己係同耶穌同一陣線,一諗到呢個位,就忍唔住笑埋一份。是的,信耶穌不是要說服自己去相信世上有神存在,而是要相信世上一切政經權勢都會有終結的一天,以死亡來威嚇人服從獻媚的權勢都是放屁,相信耶和基督和背後的天國才是永遠長存──而因為我和這天國是一伙的,所以我唔驚你,亦唔會向你屈服。

catsss

失戀無人陪然後呼天搶地,返工畀老世鬧搞到鬱鬱不得志,睇AV之後覺得好有罪咎日日求主赦免,這些「試煉」只是我們今天的穿鑿附會。搞門訓去修正這些誤差,不會使我們更像彼得,更像耶穌的門徒。如果你不理解彼得他們在當時是如何被指控危害國家安全,如何使宗教領袖感到他們正在動搖自己的宗教利益、社會地位,你是不容易理解耶穌基督的門徒正在面對怎樣的「百般的試煉」,然後那份喜樂就自然不得其門而入。

話雖如此,如果焦點對得準,門徒訓練對今天只愛在Facebook打嘴炮、動不動寫篇聲明就當踐行了信仰的信徒來說,也是好好的提醒──信仰唔係用來講而係要做㗎。

【雅各書 1:22-27】
廣東話意譯本(參 The Message和合本
 
你哋咪自己呃自己,聽咗當做咗,以為噉就叫做聽人講。
因為齋聽唔做嘅人,就好似水過鴨背,
聽過嘅嘢,左耳入右耳出,渣都無得剩。
而當你認認真真去諗清楚,天國係點樣全力支持你打大佬,然後又真係落手落腳做出蒞,呢種認真本身就已經有回報,會畀到力量你撐落去。
 
如果有人一有教會活動就去晒,又特會又門訓又上電視又講見證又乜又七,覺得好威威叻叻豬,但平時把口又唔收,呢尐係就係自己呃自己,好假囉。
真係信嘅,如果見到嗰尐屋企人因為幫人而畀公安拉咗坐緊冤獄嘅、嗰尐畀人打成黑五類嘅、嗰尐無啦啦遇到天災橫禍嘅,你係唔會割席唔理佢哋,唔會同個世界一樣,淨係識呃like囉。

門徒訓練應該要做的事,是要預備信徒面對這個兇險處處的時代。1997之前,教會不斷想像將來有朝一日,信仰羣體會被政權擊打,牧長們紛紛思考對策,例如提出細胞小組教會模式,提出假如聚會地點變成非法,信徒自己的客廳也可以成為教會。誰知用力頂住的壓力沒有在97出現,教會好像忘記了那時如臨大敵的謹慎,紛紛轉為購地建堂。而諷刺的是,浙江教會的十字架一個一個倒下,信徒集資興建的大教堂被剷平,最近甘肅當局亦提出禁止在校園傳教。當看見建制議員如何爭相獻媚,擁護一國凌駕兩制,我們其實已沒有本錢再搞些搔不着癢處的門訓節目了。

Pakkin
http://pakkin.blogspot.hk/

本文簡短連結 http://faith100.org/tmAxi

留下回應

贊助連結
marksir 聖經考古

 

 

精選文章