陳到的崇拜筆記003——宣道會北角堂

-100%+

2017/1/1 12:15pm@北宣

(系列介紹:在下陳到會突襲不同教會的崇拜,寫筆記,作評論。無惡意的,好似係。)

我曾經有去過北宣,所以今日預好時間,直奔北宣第四堂崇拜。一去到康澤,奇怪了,無乜人嘅?門口寫著「崇拜請去真理樓」。原來本陣康澤沒有崇拜,好啦,行去真理樓,就遲了,趕不及準時入席,要在場外排隊,之後入到去,才發現要睇轉播。目測會眾年紀較大,不太見到大專生款,坐我週圍的都是太太輩。


主席和領唱都是一位姊妹,他們領唱是歌與歌之間停音樂,講幾句,介紹下一首歌才唱的。我對此沒反感,只要那領唱不矯情不造作就是了。那姊妹又的確不造作,大方得體地介紹詩歌,聲線溫和甜美,唱的時候也沒有突出自己,總之就係令人自然地投入崇拜。他們的週刊好多頁,部分詩歌歌詞印在其中,部份卻沒有,對一個新來賓來說係無可能跟到的。他們拿著歌書唱,我就企喺度,旁邊的女士示意與我一同看,我示意不必。

詩歌之後信經,奉獻,讀經,獻詩。全部一板一眼,主席繼續順暢地帶領著,會眾熟悉地配合,一切都有種大公司大機構的規模、氣度,像這些東西一直以來都如此運作。我作為新來者,也在大氣氛下跟著。

講道。他們設定了今日係靈修主日,所以講員要講相關題目。按北宣一貫做法,同一個主日,每一堂崇拜的道都是不同人講的,即係無話一個講員一篇道直踩五堂崇拜。我返那堂崇拜的講員是個男傳道,看起來像30中的年紀吧。

他用彼得前書一段講靈修,結構係極穩陣的三點式講道,每點又分三個方面,一眼看出是建道出身,飲福音派奶水大的。以下是我抄下的筆記,由於我中間瞌著咗幾次,所以應該有少少甩漏。

1. 神的道幫我們重生

  • 我們讀經的時候是面對一個永生的上帝,讀經靈修也是如此。
  • ‘give me a 窿’,人要神聖空間,for 獨處、默想。要專注。
  • 神容許人有不同方法靈修

2.神的道有永遠的價值

  • 有血氣的盡都如草,大自然是短暫的 vs 神話語永遠立定
  • 繁忙的生活,無時間靈修,靈修幫我們有更多時間。

3.讀神的話語使人健康

  • 要愛慕神的靈奶
  • 幫我們更真誠的愛人
  • 靈修就是每日回到神面前,渴慕祂的靈奶。

你問我覺得點呢?呢啲嘢當然唔係我杯茶啦,我亦唔覺得段經文係要來咁解的,但考慮到是要講靈修的主題嘛,我就不太挑剔了。我覺得內容都尚算有營養,雖然都係啲淺嘢,但至少概念上無咩錯,用來提醒信徒要靈修都要做足功課。而且那講員的presentation 都幾好,語氣溫和堅定,不失生動。唯一缺點係助語詞太多。淨係個「呢」字我數到佢講咗31次,其他助語詞都好excessive。仲有,佢個「生」字咬字唔正,「生命」講咗「身命」,好多次。

講道後就回應詩呀,家事報告呀,祝福果啲。大致上都OK,要挑剔嘅係個報告嘅牧師語氣反而無主席姊妹咁莊重。嗱,我唔係介意佢唔莊重,只係有比較,就覺得阿傳道略為輕浮。家事報告中係有問安環節的,台上的傳道叫大家問安,台下的反應不算熱烈,啲人都係握一兩個人嘅手,講兩句就算。至於我,當大家起身問安時,我依然安坐,完全避開了交際。全個崇拜最 odd 的,是三一頌。好地地成個崇拜用粵語,d歌唔啱音佢地都照唱架,但係三一頌無端端唱匪語喎,咩解究呢?

總體而言,他們的崇拜是一間大公司大機構present 出來的東西,經過長期洗練,相當成熟,無驚喜也無乜錯,四平八穩,大堂風範,就係咁。你問我北宣有無黑暗嘢?梗係有啦,但你喺崇拜唔會感受到。我特別欣賞崇拜主席,她的表現大方得體,沒有令人覺得兀突,也沒有令人注視她,我覺得主席做到咁已經好好。同埋佢把聲好好聽。

有一件事值得挑剔的。份週刊。明明係橫度排版,但係佢右邊開頁。喂!直度書先右邊開頁㗎。仲有,真係排到好密。喂,你地不如俾錢我我幫你設計過丫。

本文簡短連結 http://faith100.org/ZnsBQ

留下回應

贊助連結
marksir 聖經考古

 

 

精選文章