倚天

塵世間一介無聊小傳道。

點解仲行?——寫喺69遊行之後

好幾年無參與遊行,又好耐無寫網文,行完就寫返幾句。

20190610FB22-1

尋日喺途中,身邊嘅人問:「點解你嚟行呀?以為你唔出嚟添。」我的確考慮咗好耐,以前好多人問過,我都無話過會行,點解最後出咗去,一時都好難答佢。因為對政府不滿?因為抗爭?要為公義發聲?希望政府收回?傻啦!我喺途上都同身邊嘅人講,我預計一百萬人出嚟,但政府都唔會理你(當我放馬後炮都無妨,反正對結果無影響),喺香港,遊行有效嘅日子早就過咗。果然,返到屋企,就見到啲建制政黨紛紛跳出嚟話支持修例,立法會如期二讀,仲即日三讀。雖然無燒山咁神,但只要留意近十幾年時局發展,又唔太天真,唔使預言都會知道。要改,一係革命、一係神蹟,搞革命我就無本事,搵個地方靜靜地祈禱求神蹟好過。

如果話「唔理結果,過程重要。」老老實實,遊行過不下十次,過程已經「享受」夠,希望以後都唔再行。「盡力嘛,有做好過無做。」星期三考DSE,星期日花十個鐘好努力咁串熟A-Z,算吧啦!沿途聽到啲街站叫口號,就更令人厭惡,「林鄭下台」呢啲,由「老董下台」、「貪曾下台」、「狼英下台」,到今日有邊次特首下台會換個好嫁?至於其他人下唔下台,又有咩關係。無膽叫「雜總下台」,就慳返啖氣啦!仲有咩「係香港人嘅驕傲」,我聽到即刻忍唔住同身邊人講:「驕乜鬼嘢傲?係香港人嘅悲哀嚟呀!」佢都即係明白:「係呀,唔係咁悲哀,都唔使咁多人行出嚟。」唔係講得好聽就係好事,三十年前百萬人遊行為聲援北京學生,譴責中共政權,政權都仲會理下;三十年後百萬人遊行,已經係香港人嘅安全,仲唔敢鬧中共,只係叫佢哋換過個傀儡,而係連個傀儡都唔會理幾多人行。有幾咁值得驕傲?我聽到都覺得無恥,而呢班搞社運嘅飯民咁又叫得出口,真係無恥無極限。

如果有用,可以改變到啲嘢,辛苦啲都值得,明知無用,又咁厭惡,仲行嚟做乜?我心情真係好矛盾。

喺遊行前幾日,有第一次參與遊行嘅人,PM我,話好擔心,但又要出嚟行;有視障朋友話行,問我可唔可以陪佢,但我當日有家事要處理,夾唔到佢嘅時間,只有無奈地叫佢搵其他人幫手;仲有我年過七十嘅老媽嚟同我講,佢都想行,本來睇大戲,已經俾咗啲飛朋友⋯⋯仲有喺FB見到好多十幾年都無參與過社運嘅人都蒲晒頭;浸聯會、宣道會都冒住險發聲明、出呼籲;平日怕事龜縮嘅教會,都起碼出個代禱事項反修例。雖然,我仍然覺得,無神蹟,做呢一次都無用,用對方覺度諗下,如果我係極權政府有需要理會呢啲事咩?無嫁,繼續就得。

可惜我唔係極權政府,我係佢哋朋友、家人、牧者,我能夠唔理會佢哋嘅努力、勇氣同改變咩?喺有人想改變,有人想努力,我就只能陪住佢哋,一直行到最後。

留下回應

贊助連結
陳韋安洪麗芳 寫給你心中尚未崩壞的地方

 

 

精選文章