馬斯特

係咁架啦,好出奇呀 -- 黃子華

面對有人反對萬聖節,只需問一個問題

cosplay_jesus_at_comic_con_by_potterhead_whovian-d5k1wgx

我真係唔太在乎有信徒反對慶祝萬聖節,年年要重覆三幅被亦好無謂,亦唔見嘈過之後有乜人轉變立場,你有你領受,我有我自由。正如我唔會反對一個穆斯林唔食豬肉,然後不斷同佢講豬肉幾好味,幾有營養,務求說服佢食豬肉為止。因為我知呢D叫信仰,而信仰係有好個人的一面,唔一定可以用理性解釋。

但好死唔死,好多信徒認為,即使唔講信仰、唔用聖經、唔用教會傳統,我地都可以用公共理性去說服其他人,基督教倫理觀係比較優勝,值得社會採納,就算你唔信耶穌都好,跟住做係有益。呢樣野,應該歸功於關啟文。

個問題在於,教會反對一樣野,通常係先有立場,即所謂聖經根據,然後去搵理由,再妖魔化件事,提出好多陳義極高嘅原則,左一句上帝不喜悅,右一句聖經係咁寫,前一句話會鬼上身,後一句問你係咪基督徒黎架。例如係反對萬聖節呢件事上,聖經根據係「上帝是忌邪的神」,萬聖節係拜鬼,所以基督徒要反對。呢個論證前後兩句都無問題,問題出於點去證明「萬聖節等同拜鬼」?以來源去攻擊萬聖節,但當有人提出聖誕節一樣有異教根源,係咪要同時間反對,佢地會即時hang機唔識回應,話我地而家討論緊萬聖節,唔係講聖誕節,所以唔關聖誕節事,形成雙種標準。提出一條原則,但放過無數例外,咁仲叫咩原則。

無他,因為果堆理由,從來無深入去思考究竟合唔合理,適用範圍應該有幾大,點樣處理例外情況。正如唔知邊個牧師話扮鬼等於交鬼,首先,可以去翻查一下聖經,有無記載過鬼係咩樣?D鬼會唔會係燒味鋪前面瀨叉燒?聖經只有講過被鬼附的人係點,從來無形容過鬼係咩樣。現時魔鬼嘅典型形象,係取材自希臘神話中半人半羊的PAN。雖然你可以話PAN都係異教之神,唔扮好過扮,但平常cosplay扮聖鬥士星矢入面雅典娜果D又點計先,仲有好多信徒有睇過套《沉默》,男主角里安納遜先前做過宙斯喎,佢又撩鬼攞命呀?咁有無案例小朋友去完party扮完Elsa之後集體鬼上身吖,誇誇其談,但從來無證據證明。

600_phpxnoQhR

曾經上過李錦彬牧師的《從聖經中辨別諸靈》,係聖經中,鬼係屬於靈界,無形無相,無人講得出鬼係咩樣,只可以申請成非物質文化遺產。所以根據聖經,人係唔可以扮到鬼,只是扮演到創作出黎,經過藝術加工嘅形象。

或者真係去下D party就知,真係會扮鬼嘅人,係少之又少,只係一個cosplay大會,唔少人甚至會扮成耶穌添。扮耶穌會鬼上身呀,咁教會又叫人效法耶穌喎,點呀,跟唔跟好,果D Comic com 咁點呀,去完個個比鬼責呀。好多時D福音話劇都會有人扮魔鬼添啦,又點計數?

過去三四十年,教會總要誣衊D新興事物,話係靈界陰謀、魔鬼把戲,要擄掠人心,電影、流行音樂、電視劇、小說、互聯網、電子遊戲、智能手機,樣樣比教會屈過,然後呢,就進入教會成為傳福音工具。可以預測,下一個被屈係魔鬼陰謀,肯定係電子付費系統,呢一鑊仲唔係獸印,之前估錯咁多次都無中到,而家連乞衣都唔收現金,要用個支付系統比錢,今次一定係堅架喇,留名睇下班支持大國崛起嘅教牧點拆。

170421beggarbarcode

教會成日話人迷信,其實自己又差幾遠,成日話民間信仰基於恐懼,樣樣都怕,禁忌處處,教會入面一樣呢樣唔做得,果樣唔做得。

更大鑊係,佢地經常拎住呢堆「理由」,走出黎嘗試說服其他人支持,對住信徒好少少,聽得明佢講乜,同為肢體留兩分薄面。對住非信徒呢,人地又點會咁客氣,當然比人駁到體無完膚。而當其他人駁斥呢班基督徒提出的理據,真係好似撞鬼咁,無論如何討論下去,班教徒立場總係紋風不動,甚至覺得自己為義受逼迫,反而令到佢地更加堅持己見。

其實呢種人,只係為咗表現自己的宗教情操,就一如好似企係街口祈禱嘅法利賽人一樣,我實在告訴你們,他們已經得了他們的賞賜。再講,好多反對慶祝萬聖節嘅人,本身唔會,亦從來無參加過萬聖節活動。呢種信仰宣示,話自己為上帝唔慶祝萬聖節,唔去鬼屋玩,著實係好廉價,因為倒頭來佢地根本無犧牲過任何野。(話是話,荔園間鬼屋存在超過幾十年,點解當年無人鬧過,叫信徒杯葛荔園。)

《令人噴飯的謝飯》中提過,好多基督徒話自己為主付出,唔做呢樣唔做果樣,實情係佢地無能力去做,盡力去做亦唔會有咩成果。明明係世界中撈唔掂無發達,就話自己唔貪愛世界,知足常樂過簡樸生活;明明係溝唔到女溝唔到仔,就話自己要運用獨身恩賜,服侍教會。真係人唔笑,狗都吠。最慘係,呢D人即使走入教會服侍,好多野做到一蹋糊塗,不如老老實實走返出去貪愛世界算啦,咁就真係服侍到教會喇。

真係,唔通我因為要效法耶穌謙卑做僕人,而放棄唔做國家主席,又要話比你聽咩!

要明白一件事,佢地做緊係一種信仰宣示,而唔係打算溝通搵共識尋答案,但佢地又怕比人話唔理性,所以又會擺一個樣能夠同人理性溝通,到辭窮理屈之時,又搬返信仰自由出黎為自己辯護,話大家唔可以因為佢信仰而咁樣批評攻擊佢。

年中唔少人咁中計,浪費生命同佢地傾。

對付佢地只要問一個問題,問佢係咩情況下,佢地會考慮改變立場。如果佢話無論點都唔會的話,你指出佢地既然唔會改變,咁討論黎做乜,不如慳返啖氣好過。

後話

我咁寫,一定有人出黎挑機,話如果證明到扮Batman會鬼上身,咁我會唔會改變立場,反對人慶祝萬聖節。

首先,要證明到cosplay Batman係會鬼上身,我覺得呢件事難度幾高下,但而家無數人證明到,去完扮鬼扮馬,trick or treat,無穿無爛。

其次,萬聖節如果變質,Party唔單止係扮鬼扮馬,仲會拎套「通靈板」(Ouija board)出黎玩,咁我肯定會反對。因為作為一個理性嘅人,係會因應實際情況改變而修正自己諗法,但以現時的判斷,大部份萬聖節活動,不涉及到教會關於靈界嘅指控,毋須過份擔心,反應過敏。

留下回應

贊助連結
龔立人 - 在暗角言說上主

 

 

精選文章