關於「主愛臨香江」的思想實驗
[本文蒙作者允許轉載]
「主愛臨香江」佈道會自面世以黎,網絡上出現無數批評嘅聲音,甚至有信徒發起聯署杯葛。要分析所有「主愛臨香江」所帶黎嘅弊病實在困難(因為太多)。但有冇可能,某部份嘅質疑只係針對執行上嘅不當,實質仍樂於見到大型佈道會嘅出現;而某部份嘅質疑係針對原則性嘅問題,認為搞大型佈道會本身就係一件惡事?透過以下一個假設性嘅思想實驗,或者可以有助我哋去除現實嘅複雜性,審視「主愛臨香江」的核心問題所在:
- 假設大會能夠請到德高望重嘅教會領袖,例如司托得、戴德生同慕迪做講員(假設佢地仍然在生);
- 假設大會嘅花費能夠大大節省,帳目分明;
- 假設佈道會冇咁「奢華」,只係用大型堂會做主場,而唔係香港大球場;
- 假設大會籌委邀請大量年青信徒參與其中,等年青人可以「接班」;
- 假設最後數以萬計嘅人決志信主;
假設以上嘅美夢一一實現,你會唔會就對「主愛臨香江」疑慮盡掃,甚至大舉支持?如果係嘅話,咁你可能唔係反對大型佈道會,只係反對搞得差嘅大型佈道會。對我黎講,我固然渴望以上嘅事情全部成真;但係縱使如此,我依然覺得有點不妥。後來我翻查左一堆資料,我終於明白到呢種不妥嘅來源:
陳一華牧師在接受訪問時補充,香港正面對社會的撕裂和仇恨,更需要大型佈道會,為冰冷的社會喚起人從神而來的溫情。
(時代論壇)
大會總幹事陳一華牧師表示,面對社會的撕裂、爭拗和矛盾,再加上2017選舉年鬥爭氣氛將更濃厚,壁壘分明,更加需要愛在當中,也是延續十年前「2007福臨香江福音盛會」的葛福臨佈道會的精神和回應社會時代的需要,期盼藉着大型佈道會,將愛帶進社會!
(號角)
我引用陳牧師嘅言論,唔係為左批鬥佢;反而,作為一位事主多年,努力傳揚福音的老牧者,佢有咁嘅諗法係合情合理。事實上,除左陳牧師以外,我相信大會上下其實都有著呢種信念:現今香港社會問題日益嚴重,市民活係水深火熱之中,教會必須有所作為,回應時代的需要 — 好!我哋一於搞個大型佈道會!
「主愛臨香江」背後所帶出嘅信息,就係認為佈道會係解決當下社會撕裂嘅靈丹妙藥。當然,傳福音、搞佈道會,係教會經常做、亦都係應該做嘅事。但背後呢種「佈道會救世」嘅心態,我覺得實在未能針對現時社會嘅困局。所謂「撕裂」,其實係講緊邊班人嘅撕裂?為左乜野而撕裂?對佢地宣講一次「福音運作嘅原理」係咪解決撕裂嘅好方法?
我唔否認,部份社會嘅撕裂係因為人缺乏愛心、自以為是。但係呢個唔係最主要嘅因素。我地可以為左支持唔同嘅球隊、明星而鬧交,但呢種雞毛蒜皮嘅事唔會造成社會撕裂。真正嘅撕裂,係源於社會核心價值嘅爭論,所有人都無法逃避,所有人都必須表態。但如果純粹係價值觀嘅爭論,只要持平理性、互相尊重,尚且唔至於撕裂一個社會;但現實係,言論自由正慢慢被有權勢者收窄,持某種立場嘅人會受到各種迫害同攻擊,正如阿摩司先知所講:
你們怨恨那在城門口責備人的,
憎惡那說正直話的……
所以通達人見這樣的時勢,必靜默不言,
因為時勢真惡。
(阿摩司書5:10, 13)
正因為咁樣,所以先會造成社會嘅不安同動盪。
另一個角度講,呢種撕裂,就係真理同歪理之間嘅撕裂。唔通耶穌要為基督徒同猶太宗教領袖嘅撕裂負責?唔通馬丁路德要為新教同羅馬天主教嘅撕裂負責?當然我哋需要時刻反省,會唔會我哋只係自以為掌握真理,不知不覺成為左「唯我獨尊」嘅人;但當你考查到某個地步,你必定會發現,香港今日嘅困局係源於有人歪曲是非,藉權力打壓異己,藉壓榨弱勢社群以謀取暴利。事已至此,真理同歪理絕無並存嘅空間,我哋只係淨低一條可行嘅路:
你們要洗濯、自潔,
從我眼前除去你們的惡行;
要止住行惡,學習行善,
尋求公平,解救受欺壓的,為寡婦辨屈。
(以賽亞書1:16-17)
佈道會本意係好,但如果將佈道會視為解決香港的問題嘅終極手段,咁樣恐怕係捉錯用神。香港嘅問題唔在於太多人未聽聞福音;其實大部份人都已經聽過。如果今次嘅佈道大會依然只停留係宣講「幸福音」、「信耶穌乜都掂」嘅成功神學,咁我哋就再次成為左耶利米先知所責備嘅對象:
他們輕輕忽忽地醫治我百姓的損傷,
說:平安了!平安了!其實沒有平安。
(耶利米書8:11)
但如果大會講員將會宣講嘅,唔再只係強調「個人得救」、「救恩原理」嘅信息,而係痛斥香港人利慾薰心、見利忘義、背棄上主對公義嘅要求,然後講員呼召眾人,包括未信者、包括基督徒、包括係佈道會事奉嘅人,誠心悔改、係上主面前跪下禱告,求恩典、求憐憫,或者香港仍有希望。
我哋需要為今次大會好好祈禱,願真理臨香江。
戈騰狄
留下回應
相關文章
精選文章
- 可唔可以唔好咁?走在鮮血上的抗爭之途
Rony Tse
「點解香港人每次都要靠呢啲傷心、難過嘅事先可以團結起來?可唔可以唔好咁?」在悼念周梓樂弟兄的「主佑義士」追思會上,一位前線急救員在台上發出絕望的呼喊。 「可唔可以唔好咁?」這是不少抗爭者,… 詳閱
- 為何教會不是藍就只會是某種中立?
Bilibala
其實中立是否代表客觀?定還是兩邊都唔幫,保持沉默,又或者做大好人,叫雙方有理冇理,忍讓下,原諒大家,最緊要合一,一團和氣呢? 按著人事物的不同,中立的站立點也可以不同,更何況許多社會大型爭… 詳閱
- 理大尋羊
牧羊犬
「一個人若有一百隻羊,其中一隻走迷了路,你們的意見如何?他豈不留下這九十九隻在山上,去找那隻迷路的羊嗎?若是找到了,我實在告訴你們,他為這一隻羊歡喜,比為那沒有迷路的九十九隻歡喜還大呢!… 詳閱
- 荒亂年代的機構事工
胡志偉
「反修例運動」巧遇中美貿易戰,拖累本港經濟,預期社會與教會受到影響,特別是基督教機構事工。 這半年來,機構主辦的講座、課程等不同聚會,或要取消,或要延期舉行。當教牧與信徒心情牽掛社會運動,… 詳閱
- 魔雪、盧旺達、復和福音
Cotton
早幾日到戲院看了《魔雪奇緣2》(Frozen II),在此不便劇透太多,但當中的政治含意及社群復和,實在值得我們深思。簡單講,社會矛盾背後,涉及政權的操弄、人性的自私醜惡,製造仇恨敵對,一旦社會族群被… 詳閱
- 20191208證道:以喜樂的心等候主
Peter Koo
https://docs.google.com/uc?export=download&id=12aDRKAOEewrcLtMuZJU8-JHBvj3fiZQM#.mp3 https://drive.google.com/file/d/12aDRKAOEewrcLtMuZJU8-JHBvj3fiZQM/view?usp=sharing 或 https://1drv.ms/u/s!AvAmzmtESYEAdbYSHQhEwqk6Z_Y?e=oB1dTu… 詳閱