倚天

塵世間一介無聊小傳道。

講道之難

profesor

差不多十年先發現「道,原來係咁聽。」同樣,也花十年先發現「道,原來係咁講。」

喺未出道之前,經常有前輩循循善誘咁指導我:「神學院學嘅,好多時都未必適合喺教會講,要講多啲生活例子同應用。」而我一直有個疑問:「如果喺神學院學完,喺教會唔啱講,咁做乜要去讀?教會又為乜要請神學畢業生呢?」請一個生活經驗豐富,人面夠廣嘅,咪多啲生活例子講囉!

如果一個天生口才好嘅人,其實講咩都得,廢話一堆都會有聽眾、甚至FANS。但對於我一個寫嘢好過講嘢,唱歌好過講嘢,XX都好過講嘢嘅人,講道,仲叫我學咗嘅內容唔好講,絕對係承擔起一件吃力不討好的事。我又自知無能為力、沒有貢獻,所以由開始行上講台,到今時今日,都只同自己講:「我應該控制唔到篇道講得好唔好,會眾接唔接受,我只能每一次都盡力預備。」我並無理會那些前輩的教導,讀完書,當然係講返神學院學嘅嘢啦!

內容需要,閱讀、釋經、分析、整理、編排;演繹需要聆聽、觀摩、模仿、練習、建立風格,再練習等等。話得盡力,真係要盡力,我讀寫無乜障礙,演繹就要花啲功夫,我試過練講一個大約半分鐘嘅笑話,由夜晚十一點練到零晨三點,反覆練幾百次;但咪以為笑話難練,要人喊嘅仲難,因為無半分鐘傷感故事,反覆練幾百次係要幾日幾夜,而我又真係試過練足幾日,都未能達到預期效果。

好多嘢努力都唔能夠解決:釋完經,諗唔到合適例子講解點樣實踐,起承完轉唔到合;釋完經,發現唔啱既定主題,要決定夾硬連上關係,改主題去就經文,定係重新做過;講完會眾聽唔明;發台瘟連自己都聽唔明……

神學畢業遇上沙士,講道被放上網,都未知自己講乜時,竟然發現有人喺網上聽到我講道而返返教會;但相反,努力預備,自覺講得幾好,可能又會換嚟好大怨氣:「你講乜呀?」我開始發現,其實講成點同會眾反應係無乜關係。

有一次講道,我用一個要講十幾分鐘嘅連爆笑話總結,由於故事本身精彩,照讀已經將經文、生活連結埋,會眾聽到笑中有淚,之後仲唔少人同我講反自己感受、反省、掙扎;無幾耐對住另一班人,一模一樣咁講,但呢次好似對一班喪屍,全場目光呆滯,毫無反應;講得一陣,好似連自己都沾染咗「屍氣」,周身唔舒服。

身為講員,又自知講嘢人哋聽唔明,我好想了解會眾情況,知道應該點講。但越留意會眾,就越發覺無能為力,因為每個人用緊唔同器官聽道,有人用腦,有人用其他。如是者,跌跌碰碰咁過咗十年,有人讚好,有人彈核,就算同一場合、同一信息,都會有讚有彈,不過通常讚嘅同我講,彈嘅周圍講。期間又收到唔少意見,少部份有見地,令我茅塞頓開;大部份關乎個人喜好;仲有部份係以為自己有見地,例如用幾十年前嘅釋經書,「提醒」講員應該用近年已經被其他學者視為錯誤嘅解釋。

提供意見都都係真誠,以為自己意見有用同重要嘅。我認為講員要認真回應,但我認真分析,就知有用嘅意見不足一成。而要對每位提供意見嘅人都認真回應,絕對困難。例如甲認為要多啲釋經,乙認為要多啲例子,兩認為講得大長喇。我最多可以同時滿足兩個人的要求,無論滿足邊個兩,最後都係得到「唔接受意見」(第三個)呢個結論。

講道之難,難於上青天!對一個不善詞令嘅人,要講篇清清楚楚,有文有路嘅道,又唔太悶嘅道,本身已經難。更難係毫無準則的回應,收到回應係好係壞,同講得好定壞,可能完全無關係。有人話,講員嘅行為、品格更重要,但好得群眾喜愛嘅「星級講員」,會眾真係認識佢哋為人咩?咪都係講得好聽。學佢哋講呢?有啲天賦才能係無得學嫁。如果夠長命,又夠勤力,努力十年八載應該有啲起色。

講道之難,難於上青天!有高人指點或者會好啲,但巿面上,唔係靠天賦才能,而係自己努力講得好嘅講員已經唔多,要撞啱係你同事,可以成日聽到你講,而你哋又傾得埋,或者佢有督導你嘅責任,咁進步就會快好多喇。不過咁啱遇到個有料到又肯教你嘅前輩做同事,同遇到理想對象嘅難度差不多。

「道,原來係咁講。」係我畢業十年,講過二、三百堂崇拜之後領悟嘅。能夠隨著聖靈感動,照講就得,唔好理其他人喇;但「感動未必經常有,輪到嗰日就要」,平日預備好自己,留意身邊嘅人同事,其實都會感動,聖靈感動,未必有靈異經驗嘅。肯定自己嘅信息,準備充足,有時預咗講完得罪人,抱住死就死嘅心情(唔使篇篇都得罪人,但教訓、督責、宣告罪惡呢類得罪人嘅信息,一、兩篇就會致命),放膽講就係。因為喺台上宣講,唔係滿足會眾喜好,而係宣告從神而嚟嘅信息。

唔理會眾喜好唔等於唔理會眾,要為會眾能夠領受而預備,增加會眾的溝通,聆聽意見;請人先讀講章,再作修改才宣講。

最後不能在意反應,即使講道好似倒水落海咁,都要盡力做到最好。

「倚天!我照你講咁改咗嗰段,崇拜後有人話好講中佢情況,有好大反省呀!」

「你演釋得好,會眾有反省、有回應,咁咪好囉!」

我都預計唔到人聽完有咩反應,我只係建議佢諗得仔細啲,用字準精啲啫。而呢啲係十幾年嚟喺槍林彈雨下,流住血淚鍛鍊反嚟嘅成果。希望新一代同工比我哋幸福。

留下回應

贊助連結
陳韋安洪麗芳 寫給你心中尚未崩壞的地方

 

 

精選文章