倚天

塵世間一介無聊小傳道。

聖靈感動嘅經驗之談

本文純屬個人經驗,主觀感受。

「喂!」

「喂!上嚟呀。」

「好!」

呢段係好耐好耐之前,同中學同學講電話記錄。對方拎起電話,一聲喂、一聲好,我又無講係我上嚟、定佢上嚟,對話冇時間、人物、地點,但唔會認錯人、去錯地方或時間唔啱而白等。講完呢個電話,忽然覺得好得意,呢種「認得」係建基喺長時間或頻密嘅相處,相熟同信任嘅關係。後來再諗,要證明係咪對方,到事後見到面就得,當時係無法證明,但即使後來見到,亦從來無試過證明「頭先嗰個係咪你?」,反而唔認得即時畀人鬧就有。

因為直到今日,雖然已經無乜呢類朋友,但阿媽、老婆、阿女、阿仔、姑姐、表妹等一大堆人,打電話畀我都唔會講自己係邊個,假設我應該認得,而我又唔敢唔認得,因為呢堆人有晒長時間或頻密相處,非常熟同信任關係嘅條件。至於會唔會認錯,好少,但會,咪畀人鬧囉。

對我嚟講,聖靈感動嘅經驗就類似聽電話,夠熟就好易認得,唔夠熟就唔認得,點證明到?最後見到就證明到。但認得嘅唔會證,唔認得嘅證到都無用。而即使幾熟,都有認錯嘅機會。

近期其中一次我認為係聖靈感動嘅事,係早排諗起一個無見一段時嘅朋友,老婆又忽然提起呢個人點,佢哋唔熟,都唔知做乜忽然提起。咁我第二日就SEND MSG問候呢位朋友,發現朋友嘅爸爸,就喺一日前過咗身。即係我哋兩公婆,忽然諗起呢個朋友嗰日。

呢類事情間中都會發生,喺我由唔知自己諗乜,到相信係聖靈感動,經過好長時間,而類似忽然諗起個唔常聯絡嘅人,搵到佢通常都有啲嘢,受傷、失戀、離婚之類。以我對自己嘅認識,信係聖靈感動係容易過信我對人咁敏銳、咁有心。

如果認唔到會點呢?有一次又係同類情況,忽然諗起某個後生仔,當時無諗過呢個係聖靈感動,自覺好忙,諗住過幾日先搵佢。喺第二日就收到呢個後生仔離家出走嘅消息,之後就過幾星期先聯絡到。

重覆咗無數次之後,開始大概「認得」咩係聖靈感動。喺我經驗裡面,聖靈感動就係有啲嘢叫你去做囉。

最刺激嗰次係好多年前一次星期日要講道,星期六晚十一點幾,諗住睇一睇講章就瞓。點知一打開電腦,就有個好強烈嘅感動話:「唔好講呢篇啦!」我立即好誠心咁祈禱:「你咪玩我啦!」內心埋怨、掙扎咗一陣,好不情不願咁通一晚頂,寫另一篇講章。已經唔記得當年寫乜、講乜,但好記得自己嘅感動同祈禱。心諗,唔好成日有咁嘅感動,爆血管都似。

返咗十幾年五旬宗教會,又返咗十幾年其他宗派教會,我覺得無論返緊咩宗派教會,都唔少人對聖靈感動有種好浪漫嘅期望,有好激情、好劇烈的情緒,感動令人好舒服、好願意跟隨主,成個人充滿力量咁;又或者神會回答佢嘅問題,畀佢知點樣解決佢嘅困境,幫佢做佢猶疑緊嘅決定。朝住呢種感覺、回應,追求,以為會停留喺度,希望享受聖靈感動嘅感覺。

或者,有嘅,我都有過激情、劇烈的情緒,好舒服、好願意跟隨主,成個人充滿力量咁,就好似HEMAN(好耐以前嘅卡通片)講:「請骷髏頭堡暢我力量。」之後「我已經充滿力量喇」咁。但我好知道充滿力量咪要去保護巿民,打退敵人,唔通四圍同人講見證,話:「你睇下我,祈完禱已經充滿力量,而家幾勁?」由得巿民比敵人打,自己喺度賣廣告咩?

至於感動嘅信息,係答人嘅問題多,定講其他嘢多,好簡單,視乎神關心咩多囉。你認為神關心一個人升邊間學校、追邊個女仔、轉唔轉工、買人仔定美金多啲,定係神關心社會公義、扶助弱小、關心別人多啲?神咪喺嗰方面感動多啲囉。不過神關心、重視嘅嘢,係咪我關心、重視嘅嘢,其實就未必係。

當然,純屬個人經驗、主觀感受,大家唔好當真理。聖靈感動其他人,有其他方式都唔定。

留下回應

贊助連結
陳韋安洪麗芳 寫給你心中尚未崩壞的地方

 

 

精選文章