關懷貧窮學校

在生命裡做教育,從教育中看生命 ;
進生活裡學關懷,在關懷中學生活 ;
見貧乏中思信仰,從服侍中學做人。

義工 . 街友 . 馬拉人

有時有人會問我地,喺咁多年接觸街坊,同關顧佢地嘅過程中,有冇一個經歷係最深刻架,我就覺得其實每個街坊都有一個珍貴嘅生命故事,好值得去聆聽同記住,不過你問到我有邊個係最特別嘅,我就會即刻諗起一個喺兩年前認識嘅朋友,呢個服侍嘅經歷令我重新檢視我對關懷貧窮嘅睇法,以及反思我地做緊嘅扶貧係吾係同緊佢地一齊行。

話說我地嗰陣時啱啱有個基金成立左,係一啲善長特別配合我地社區嘅服侍而捐款俾我地嘅,目的都係希望啲街坊申請基金嘅門檻可以降低少少,真係做到隨時嘅應急支援,金額少少但係就立即解決燃眉之急,所以個基金叫做及時愛。有一日接倒個電話,係一間教會嘅社區服務中心打嚟嘅,同我講佢地接觸到一個馬來西亞人,因為佢無身份証,所以佢地嘅食物銀行幫吾倒佢,知道我地咩人都會關顧,問我地可吾可以過嚟認識佢,了解下佢嘅情況,話佢而家身上冇晒錢,已經餓左兩日,訓喺灣仔修頓球場到,著住對涼鞋,我心諗,下,我地有幾時話咩人都跟呀??幾個大問號喺個頭到,我再諗,嗰陣時天氣只得十零度,佢會吾會好凍呢?於是問左個社工大概情況,因為對方係冇手提,所以我只可以靠社工形容嘅嘢去搵佢,我都有啲懷疑究竟係吾係真架,不過我地撒馬利亞人行動就係需要一個立即嘅回應,作為同工梗係要做好榜樣啦,於是趕左去希望盡快搵倒佢。

IMG-20150103-WA0000去到修頓大海撈針終於搵到一位著住涼鞋嘅男士,同佢傾左好耐,知道佢喺內地做生意俾人呃晒啲錢,於是想落嚟搵朋友幫手,落到嚟搵吾倒朋友但係已經盤川用盡,流落異鄉好徬徨,而且面對吾倒家人,因為當初家人都吾贊成佢去大陸發展,感受到身為一位男性要擔起責任同想建立自己事業嘅心態,又落得如此地步嘅沮喪,諗住搵一啲大型嘅社福機構嗰陣,因為佢吾係香港人所以幫吾倒佢,去左好幾間都係冇辦法支援倒佢,令佢感到更加沮喪。雖然我地從來都冇支援過本地或內地以外嘅人,但今次都算係一個好好嘅學習,於是我帶左佢番去九龍睇下點睇住佢。

我安排左佢喺一位街友嘅地方打地舖,同搵左幾位義工嚟探佢聽下佢分享感受,等佢吾好覺得得番佢一個孤伶伶,能夠喺呢個時候陪住佢,相信用好多物質滿足佢嚟得更實際,呢一份喺佢身邊嘅臨在,喺呢一刻十分之重要,你吾駛講好多嘢佢都會覺得有種安全感,令佢個心定一啲,當佢思緒冇咁亂嘅時候就可以靜落嚟諗自己嘅前路,亦可以俾我地有機會介入佢嘅生命。講起安頓佢,吾能夠吾提幫佢嘅嗰位街友,街友叫華哥,喺年多前識佢,我話有個男人冇地方住可吾可以訓住喺你隔離,佢吾單止肯仲即刻幫佢搵啲床褥被舖,又搵埋啲牙刷毛巾俾佢,義無反顧咁回應佢嘅需要,點解華哥會咁熱心,係因為呢段時間我地成為左朋友,有時間吾中會同佢食飯,有啲咩需要我地都試下幫佢,互相照應下,佢見倒我地嘅真誠好感動,成日問我地有咩需要幫手即管開聲,佢一定義不容辭咁幫我地,其實佢咁樣同我地講,我地仲感動過佢,因為我地都冇諗過關心街坊要有啲咩回報,不過我會諗,社區關懷正正吾係有能力有權勢者嘅專利,其實基層街坊一樣可以被充權去支援其他嘅人,而且有時佢地嘅幫忙比我地自以為好識得幫人嘅社福機構更加落地貼心。

IMAG4543喺處理呢次嘅情況當中,我經歷到一份信仰當中好重要嘅功課 – 實踐合一,好多時我地講合一係喺教會到要信徒齊心,一齊敬拜一齊學習,一齊彼此相愛咁,將份凝聚力放喺建立教會群體到,當然呢個吾係有問題啦,但呢件事俾我睇到合一吾係剩係喺教會發生,而係喺社區,信徒同街坊嘅身上都可以成就合一,從一個流落異鄉嘅生命連結左我地,由連結住我地嘅義工關心佢,再由我地連結住嘅街坊協助佢嘅生活,而喺呢個過程,其實我地從來冇話自己係咩身份,但係佢就成日喺到問我:「點解我地會對佢咁好,係咩原因」,又會估我地「你地係吾係信耶穌嘅基督徒嚟,係因為耶穌嘅愛所以對我咁好呢?」但我同佢講:「我地係基督徒你估中左,關心你,除左因為愛,係因為耶穌教我地要做一個有血有肉嘅人,幫人係做番一個人應該做嘅嘢,無其他企圖嘅。」呢一份社區嘅合一感動左佢,佢對信仰有興趣,並且喺留港嘅期間嚟我地嘅祈禱會同埋同華哥一齊查經。

喺呢段期間我地嘗試觸摸佢內心諗緊嘅嘢,可能係放吾低一啲面子,所以每次提到返馬拉都有啲吾知點,但我地勸佢家人始終都需要面對嘅,佢考慮左好耐,終於決定返去,我地好開心佢有咁嘅決定,但係因為佢冇晒錢,為左完成佢呢個決定,我地決定同佢眾籌,義工都好熱心,吾夠兩日已經籌倒張機票同一個月嘅生活費,希望佢番到去可以重新嚟過,就係咁佢喺嗰年香港最凍嘅幾十日認識左我地,佢亦成為左一位基督徒,番到去雖然同家人嘅關係仍然充滿張力,但就喺一間教會嘅長者服務中心服侍。

好記得喺送佢機嘅時候,佢同我講左一啲嘢:「你地係一班好有趣嘅人,我成日喺到諗點解喺香港會有呢啲人嘅,但係就係因為有你地,有啲人先至可以重新嚟過,重新生活,你地俾我嘅,令到我因為你地嘅付出而好想俾番其他人,好多謝你地。」所以佢返到去就去左長者中心去將我地俾嘅嘢俾番其他人,你今日又俾左味呢?

留下回應

贊助連結
龔立人 - 在暗角言說上主

 

 

精選文章