關懷貧窮學校

在生命裡做教育,從教育中看生命 ;
進生活裡學關懷,在關懷中學生活 ;
見貧乏中思信仰,從服侍中學做人。

眼淚並未被冷漠抹乾

-100%+

帶左班同學仔去拾荒體驗,代入長者工作嘅處境,有一組嘅經歷特別深刻,活動後俾同學仔分享番啲感受,佢地講番俾我聽,頭先喺執紙皮過程佢地遇到一位八十多歲嘅婆婆,佢正喺到忙緊整理啲紙皮,同學仔諗住幫佢手,婆婆就吾多理佢地,當佢地諗住走嘅時候有個同學仔發現自己個衫袖有血,喺到諗吾通自己受左傷?跟住睇下自己個身有冇流血,又冇播!有個同學仔就回望睇下佢地接觸過嘅婆婆,原來啲血係婆婆架!婆婆隻手到有個小傷口,啲血一直流,流到落隻腳到,但婆婆冇理會個傷口,仍然埋首喺佢堆紙皮到,同學仔拿拿臨話俾佢知,同埋忍吾住拎啲紙巾出嚟幫婆婆止血。婆婆其實直到同學仔拎出紙巾前都吾知自己受左傷口,到知道嘅時候就講自己啲皮好厚好硬淨,冇咁易傷咁話。

問番同學仔見到婆婆隻手流血呢件事有咩感受,佢地都覺得好吾開心,忙碌嘅拾荒工作令到婆婆都吾為意自己受左傷,咁大年紀真係吾應該咁操勞。而其中有位同學仔,當我想邀請佢分享嘅時候,見倒佢拎住張紙巾喺雙眼附近到遊走,眼睛通紅……似乎喺我地一路講緊婆婆件事啲時候,佢一直聽住已經流緊眼淚,都喊左一段時間…佢嘅眼淚仲滴濕左喺佢寫感受嘅嗰張紙到…喺一陣愕然嘅氣氛中,想邀請佢講下感受,同學仔搖頭表達吾想,想繼續以眼淚去表達自己嘅感受…

當時吾知道亦吾敢肯定同學仔係吾係為左婆婆嘅受傷而流淚(完了活動後問番証實左同學仔係為到婆婆流淚嘅…),不過喺最尾嗰陣想嘗試鼓勵番同學仔,做左一個總結,分享俾佢地知過往喺好多次體驗活動裡面,都有同學仔曾經為佢地遇見過嘅拾荒長者而流下眼淚,為到佢地嘅處境感到難受,吾明白社會點解冇照顧到呢班長者,俾嗰少少津貼其實不足以令長者可以安穩生活,仍要為餘生奔波。通常我地都特別嘅向流淚嘅參與者表達欣賞同多謝,好多謝佢地將街坊放喺心裡面,好多謝佢地以眼淚表達佢地對街坊心同感受嘅景況,點解呢?

我地香港人好耐好耐都冇為到香港嘅社會問題,貧窮嘅狀況,以及基層街坊面對困難嘅處境而流淚,因為我地喺呢個社會慣左理性接受社會問題,會諗政策諗分配資源去解決佢,用數據嚟評估種種問題嘅嚴重性,我地訓練到要習慣理智去處理呢啲情況,都好正常嘅,不過咁樣嘅想法令我地嘅同理心被埋沒左,吾能夠感性去觸摸面對問題嘅街坊佢嘅感受,佢地嘅狀況冇連結到我地嘅慈心,佢地所受嘅壓迫同排斥因為理性而令我地感受吾倒,能夠為街坊流出同理心嘅眼淚實在係好難得,呢個世代好需要更多懂得為社會問題流淚嘅人,讓我地從知性嘅層面走入進深嘅層次,以情理兼融嘅態度去解決問題,比官僚嘅行政主導管理更有人性,社會將會更有同理心。

昔日耶穌流出寶血捨命為我地洗去罪孽,觸動基督徒以生命去回應這份愛嘅救贖,今日婆婆呢道傷痕嘅血流,換回呢個冷漠社會一個初心,恢復一份對人嘅重視同著緊,對生命嘅一份反思同尊重,希望有更多嘅人能夠好似呢位同學仔嘅經歷咁樣,有多一份對貧窮嘅觸動,流下同理嘅眼淚,沖洗呢到嘅冷漠,以愛潤澤我城,連結眾人生命。

本文簡短連結 http://faith100.org/v7c0j

留下回應

贊助連結
鄒永恒:教、學、人生

 

 

精選文章