編輯同工

這戶口由信仰百川編輯同工管理,工作包括引介本網作者群文章以外的作品和張貼香港教會消息。

新手返教會指南 – 用語篇

[本文蒙作者允許轉載]

如果你未信耶穌,又咁岩打算返教會,呢篇文章就幫到你。因為教會同黑社會一樣,都有好多行內術語,乜野雙花紅棍呀呢樣果樣,所以事先學好一定無死。

「流通嘅管子」:無人明呢句說話係講乜。往日無人明、今日無人明、將來都唔會有人明,所以唔洗咁執著。渠道瘀塞,夏天好容易水浸。某某牧師十幾年前已經寫書講過呢句說話又無出處又唔make sense,但係大家都仲係愈講愈高興。

「慈惠奉獻,係俾有需要嘅人」:呀無錯,呢句都係從來無人明白架。按照一般人嘅認知,俾教會俾上帝嘅叫做奉獻就好理所當然,明明係俾人嘅就應該叫做捐錢、籌錢、夾錢,但係又偏偏叫做奉獻喎…而且,乜野係「有需要嘅人」呢?人人都有需要,我都有需要,咁我係唔係俾左錢出黎又會有人俾返我?好曖昧,好奇怪。既然主席通常都會講「如果唔明白奉獻意義,可以將奉獻袋輕輕傳過」,大家都唔明,咁大家都輕輕傳過就ok嘞。記住,個重點係輕輕傳過,唔可以重重咁傳過,亦即係話:你就算唔明白奉獻意義,都唔准發脾氣掟奉獻袋架。

「~主義」:當牧師或講員想抹黑一樣野、將一樣野妖魔化,但係又費事同你講點解、或者根本佢都講唔出點解,就會用「~主義」呢種講法。「後現代主義思潮」、「消費主義」、「個人主義」乜乜物物。總之,叫得做主義都唔慌係好主意。拿,咁就唔代表佢講嘅野無道理無根據嘅(雖然大部份時間都係),只不過佢無打算解俾你聽啫。

「不完全嘅禱告」:理論上係自謙之辭。但係當個主席咦咦哦哦不知所云講左5分鐘,祈禱祈到會眾都忍唔住要偷偷地擘大眼睇下佢究竟搞邊科,臨尾都仲要話不完全,大家都會同時心諗,嘩,俾你祈到完全為止咁咪要兩個鐘囉!

「裏面」:教會講台上,無論係講道定係祈禱,好鐘意講「裏面」,實際意義不明。我係你裏面,你係我裏面嘅裏面;佢係教會裏面嘅靈裏面嘅裏面……大概係俄羅斯娃娃咁上下嘅意思。

「交通」:唔係transport。其實就係溝通,只不過教會唔講溝。就好似十幾年前仲流行成班男人約埋返團契溝女,係都唔好講出口,太猴擒會俾人照肺架。係「交通」,OK?

「蜜桃之後可以散會」:佢應該係想講「默禱」。可能係主席痴脷根,亦都可能係你太肚餓聽錯。總之成堂崇拜聽到呢句最開心。

希望幫到大家。

Kevin Leung

留下回應

贊助連結
鄒永恒:教、學、人生

 

 

精選文章