倚天

塵世間一介無聊小傳道。

拎個仔去當

當仔

「典當人生」係一齷戲劇體驗活動,見題目有趣,就同老婆一與參加。進入表演場地之前,負責人先喺場外講解,每位參加者都需要典當一件物品,能當得最高金額,就會獲得一份禮物,仲提醒參加者記得講:「盡當。」我哋諗緊喺身上有乜好當,老婆忽然話:「可惜無帶阿仔出嚟,當咗佢實值錢啦!」

老婆當然係講下笑,呢個係體驗活動,即使真係當,都會即場贖返,唔通斷當個仔喺度咩?而我哋喺呢晚之前,根本無諗過係咪可以拎個仔去當舖當。原來,真係可以,但就完全係另一回事。

以前嬰孩出世,有啲未足月或身體弱啲,親人怕佢哋養唔大,會抱佢哋去當舖典當,因為當舖屬於偏門行業,要夠命硬先入得去,所以佢哋相信,入得當舖,就唔會夭折。朝奉(二叔公)接過嬰兒,到神檯拜祭,然後喺紅紙上寫句「快高長大」嘅假當票,再打個印,作為對嬰兒嘅祝福,就交返俾家人。

老婦每年一當舊綿皮,學生未夠秤當寶玉,二世祖當阿爺遺產等等,一個個發生喺當舖內嘅故事,打破晒我過往對當舖嘅負面印象,原來開喺賭場附近同九出十三歸以外,仲有咁多感人故事。開當舖係為咗「與人為善,幫得就幫」,真係點都諗唔到。

呢一晚,仲有一件好神奇嘅事。演出早段,二叔公叫大家估下,當有人要當仔,二叔公會喺紅紙上寫咩字。其中一個觀眾,好快就喺紅紙寫上「快高長大」四個字;劇後有機會同佢閒聊幾句,佢話自己係未足月出世,出世紙夾住一張紅紙,寫住「快高長大」,所以即時就聯想起呢四個字,不過唔知係咪有關。我哋聽到都好驚喜,原來劇中發生的故事,亦同時發生喺我哋身邊嘅觀眾身上。有生以來都感到遙不可及的當舖,忽然間,變得近在咫尺,而且有血有肉、有情有義。

留下回應

贊助連結
龔立人 - 在暗角言說上主

 

 

精選文章