馬斯特

係咁架啦,好出奇呀 -- 黃子華

情人節鉅獻 《在教會單身沒有女》系列

原刊於馬斯特medium,2020年2月14日

全名

《從馬斯特個人經歷看教會單身牧養失敗之處 — 為何在教會遵守傳統教導祈禱等候閱讀屬靈書籍咨詢屬靈長輩尋求印證後仍然單身沒有女朋友》

ezgif-7-75fd9d760b89

身為教會內一名資深單身人士,一直以來,對單身事工很感興趣。背後原因,不外是「一為神功,二為弟子」,希望教會多辦類似的活動,從中能遇上神預備冥冥的一位,在教會內找到信仰相同的伴侶。其次,年的少時候,已經為意到教會內有一批為數不少的單身人士(特別是姊妹),好像沒有適合的群體,隨住年事漸長,距離職青的身份越遠,卻又無法步進夫婦團契之內,可是教會內又沒有任何合適的群體讓他們落腳,正是「天堂不收,地獄無門」。希望教會在單身牧養上,照顧到班單身人士之餘,自己又有著落,一箭雙鵰。

可惜這個一箭雙鵰之計並沒有成功,多年來久不久會提議傳道人舉辦一些適合單身者的活動,然而,總是被人用諸般的理由推搪。甚至有一段時間,自己著手搞活動,聯絡堂會內外有志之士,搞些預備給單身信徒的活動。不過,很快被傳道人發現,繼而「被關心」,然後沒有了然後。時間久了,開始心灰意冷,加上自己慢慢淡出堂會生活,亦漸漸不以為意。

直到2015年年頭,突然驚聞所屬堂會開宗名義搞Single camp,多年抑壓一發不可收拾,由最初打算寫幾篇短文揶揄一下此類活動歷久不變的內容,勞師動眾又毫無效果,甚至會帶來不必要的傷害,最終寫超過幾十篇,超過五萬字,歷時半年的大長篇。當時沒有甚麼特定的方向及鋪排,想到甚麼寫甚麼,行文十分隨意,經常夾雜粗口俚語以及不文笑話。

事後有位前輩跟我講,雖然內容有指出到教會在單身牧養上的問題,由於文字粗鄙,一般正經的教牧不方便引用,鼓勵我改一個潔淨版,找機會放上較正經的基督教媒體之上,以供同好,不失為一件美事。

一擱幾年。

近日,受到武漢肺炎疫情影響,生意淡薄,不如寫作,所以下定決心,將自己的舊文重新編輯發放,預計每星期出一篇。為保傳神,最終決定文白夾雜,先向其他華文地區人士講聲抱歉。內容方面,自己不年青,也不是牧養青少年的牧者或導師,內容算是比較針對較大齡的單身者而寫,因為教會內,當信徒去到某一個年紀後,多數假設大家領有獨身恩賜,對他們生命上面對的挑戰及爭札,幾乎係不聞不問,並且因為教會推崇婚姻,還多多少少受到壓逼及歧視。我並非有甚麼異像或是抱負,只想從自己的經歷,為這類人說幾句話。

另一件事讀者要為意,本系列以嬉笑怒罵、戲謔諷刺的形式表達,並非認真信仰反省文章,當中欠缺嚴謹的釋經解經,只係切身處地從個人層面出發,敬希注意。

正文

《在教會單身沒有女》系列一 之 教會話要搞Single Camp喎

是咁的,近日驚聞教會開宗名義會舉辦Single Camp,讓我半晌說不出話來,熟悉我嘅弟兄姊妹通常知我好有心係單身事工or脫離單身事工呢方面,過去向傳道同工亦畀過唔少意見,不過都一一被人婉拒咗。估唔到呢次真係人嘅盡頭係神嘅開端,無啦啦睇到今年職青團契全年事工計劃,其中一樣重頭戲竟然係Single Camp。

不過據我過去參加過各種各類教會嘅單身活動,普遍係西多過like,多西少like,有西無like。為免我又比人覺得成日投訴教會活動,然後事後又比人串話做乜事前唔出聲同幫手,事後先出黎吠。大佬呀,事先我知道係咁,我直情唔去啦,我係瀨完咁多鑊出黎呻下啫,比下面好喎。所以,今鑊我決定吠左先。

今次我以一名資深單身信徒,現身說法講下教會搞呢類活動嘅問題,期望日後有所改善,或者甚至係最好唔好再搞,放大家一馬。

作為一個資深信徒暨單身人士,係教會參加過無數so called單身事工、戀愛講座、感情工作坊等等,從來未遇過一個活動真正能夠切合單身人士(即係我)嘅需要,照顧到佢地生活實際面對嘅挑戰同困難,以及信仰上嘅爭扎,更加未見過有人去完呢D活動之後,真係會搵到個男/女朋友,反而不必要咁加深咗一啲成見,對教內單身人士造成無謂嘅傷害。

例如有次參加教會so called單身事工,請到余德淳黎講talk,余德淳喎!講talk喎!我初初有啲期望,但聽聽下越黎越唔對路。成個talk內容係圍繞如何提升自我形像,如何與人溝通,建議你同人講野係要望對眼,要懂得好好愛自己,連自己都唔愛就難要求人愛你,神係愛所有人呀,聽完我真係眼都突埋。當然我唔怪責余德淳,因為佢對聽眾群體並唔認識,只係靠教牧提供嘅資料,但聽完佢咁講,我完全清楚一班教牧係點睇呢班單身人士,咪係不懂自愛,自我形像低落,唔識同人溝通,講句說話無膽望人,一大群自怨自艾嘅毒男宅女!

咁呢個當然唔係事實啦,至少我在場嘛。

又例如我,作為一個資深單身弟兄,係教會經常聽有人同我講:「教會咁多女仔,做咩唔揀返個。」喂,你唔尊重我都尊重下教會班女仔,講到好似去街市買西瓜咁容易,揀~!返~!個~!

亦從來未見過,有人因為參加過教會so called單身事工後,真係有所發展,係埋一齊拍拖繼而結婚。

即係話,若果以脫離單身為目標的話,教會搞呢類活動成功率奇低,絕對係低過你自己出去識男仔識女仔。雖然佢地每一次會話自己成功咗,每次好感恩好感謝主咁,不過返得耐教會,除左安息禮拜唔會咁講,搞乜活動走唔開係呢幾句,無乜希奇。搞場大龍鳳,出到黎又無法對準目標,咁點解教會仲要花精神時間心機去搞呢D活動,浪費信徒一個大好週末呢,我留係屋企打下機唔好。

所以,不如唔搞好過搞。

之後會以幾個方面,去講下教會呢類型活動失敗嘅原因。

在教會單身沒有女 系列
  1. 情人節鉅獻 《在教會單身沒有女》系列
  2. 《在教會單身沒有女》系列二 之 究竟搞單身活動定係自我形像提升工程

留下回應

贊助連結
陳韋安洪麗芳 寫給你心中尚未崩壞的地方

 

 

精選文章