馬斯特

係咁架啦,好出奇呀 -- 黃子華

好感恩,睇住教會蝕咗二十萬

20160505141638035

此文回應信仰百答(二)

近年不少教會坐擁巨額儲備,多餘的儲備應否利用作投資之用?當然有很多人擔心投資失利難以交待,但現時香港的低息環境,存放在銀行等同虧蝕,應該如何處理?

注意:本文內容含有曲線,曲到圓,曲到直,揶揄諷刺,黑色幽默等內容,未滿十八歲人士需由家長及成人陪同閱讀。

正文

我真係好感恩,睇住教會蝕咗二十萬,見證到主的大能大力,對教會嘅保守看顧。

是咁的,我之前係另一篇文《不要依靠人,更不要依靠人仔》入面寫到,敝教會執事係無知會會友大會嘅情況下,將接近一半儲備拎咗去做人民幣定期。我真係好感恩,因為一買入無耐就遇上中央暴力貶值,就應驗經上說:「在人不能,在神凡事都能」,有邊個估得到人民幣會有急跌一日,我見證到神嘅大能大力,任何權柄都要俯伏係主腳下。一年下來,人民幣已經下跌接近10%,我深信當中一定有神嘅美意。

我果時係到諗,唔知執事會有無退場機制,唔知蝕到幾時會止蝕,定一直會蝕落去。但感謝主,無比教會儲備一路蝕落去,整件事有主嘅手托住,保守住教會嘅儲備。係最新一期嘅財政報告入面,我已經見到有匯率虧蝕一項,一個轉手買賣,教會就蝕咗二十萬,我睇到當中有神嘅帶領同聖靈嘅作工,真係無法禁止我嘅咀唇讚美主。

哈利路亞,感謝讚美主,我知道二十萬唔係一個小數目,可能係貧苦大眾一整年的收入,但,點解我地要咁執著蝕咗幾多,點解我地好似昔日門徒咁,見到真哪噠香膏打爛之後,淨係覺得好貴,可以賙濟窮人,而無諗過咁珍貴嘅野係直接用係耶穌身上。有窮人常與我們同在,向佢地行善隨時都可以,只係為主蝕錢嘅機會唔常有。

賞賜的是耶和華,收取的也是耶和華,呢個只神比我地嘅考驗,係天父爸爸叫我地學習捨棄呢個功課,明白非勢力,非才能,亦非人民幣,乃靠主的靈成事,叫我地唔好依靠金錢,惟獨依靠主。唔好為自己積儹財寶,地上有蟲咬,會鏽壞,又有賊黎偷,惟有蝕咗之後,就無蟲咬唔會鏽壞,又無人偷得到。

點解唔係正面D去諗下,如果我地繼續持有人仔,係會蝕更多。係主賜下聰明智慧比一眾教會執事,當中又有聖靈嘅引導,作出呢一個明智決定。我更加要大大的感謝神,係神保守教會投資人民幣呢段時間,無發生支爆,令到我地血本無歸,天下萬國的權柄都已經係我主耶穌身上,惟有佢係萬王之王,萬主之主。

我更加要感謝係一班執事,佢地不辭勞苦咁去服務教會,因為知道係投資呢件事上,無論點做都有人唔滿意,所以佢地索性唔公開,執事們是個義人,打算暗暗的買入,不願明明的讓大家爭吵。蝕咗之後,又知道可能會引起爭拗,大大破壞教會合一,所以又靜靜雞放咗,難道大家睇唔到當中有神嘅靈運行係當中,感動各人建立教會。我實在要大大感謝稱頌讚美主,比敝教會擁有一班咁良善誠實嘅執事。人嘅意念,又點會超過神嘅意念呢,我相信憑上帝手所做嘅一切,一定係以教會最大嘅益處著想,作為一個有限嘅人,我係無辦法理解無限嘅上帝。上帝係一個可以化詛咒為祝福嘅神,蝕咗廿萬又有乜好驚。

講到尾,我地最緊要對神有信心,因為答案就係耶穌。

補充

在上一篇《帶著矛盾返教會》當中,略略提到一個問題:教會叫人不要積攢財寶在地上,要積攢在天,意味叫人奉獻給教會,但教會本身如何實踐「積攢財寶在天」呢?卻甚少討論。

結果,特別是巨型教會(Megachurch),在扣除正常的支出後,依然能累積出數以千萬,甚至上億計的資金,經常要為資金尋找出路。加上香港過去長時間的低息環境,儲蓄跑輸通脹的情況下,不作任何保值的投資如同虧蝕,長遠損失購買力,才出現教會應否利用儲備投資的問題。

另外又觀察到一個特別的現象,雖然說教會中產化,有不少專業人士,私下投資有道。一旦需要為教會投資,往往蝕本收場,個人的專業知識及投資心得,無法過渡應用在教會之上。一朝被蛇咬,十年怕井繩,令到不少教會只會將儲備放在銀行長年不動,又引起信徒的關注。

追本溯源,我們要解答一個問題:相對於個人,對教會而言,怎樣才算積財於天?是去買人民幣麼?是去做港幣定期麼?是任何更積極進取的投資計劃麼?

這問題留待大家去思考。

留下回應

贊助連結
marksir 聖經考古

 

 

精選文章