關懷貧窮學校

在生命裡做教育,從教育中看生命 ;
進生活裡學關懷,在關懷中學生活 ;
見貧乏中思信仰,從服侍中學做人。

外判清潔工友的日常

尋日係元朗落區,去到一個垃圾站同「站長」吹吓水。做咗外判清潔十幾年嘅站長話自己以前都係「專業人士」,係金屬車床嘅師傅,真正嘅鋼之鍊金屬師,但一個工業北移,專業都變為失業,唯有馬死落地行,改行倒垃圾。
講到最低工資立法後,對工友們有乜影響?
佢話有好又有唔好,冇錯對工友們的確有咗最低保障,但連帶對其他基層勞動工種,如飲食和保安業嘅工資亦向上調升,因此越為年長的老友記未必能得到聘請,所以在缺少選擇下,便只可投身外判清潔工,同時行內亦面對越來越少人入行,長期嚴重欠缺人手的情況。

而站長亦分享到在這十幾年的工作經歷中,亦清楚看見香港人的生活有幾浪費。
「係垃圾站,日日都見唔知有幾多新凈嘅傢俬電器,未剪價錢牌嘅衫褲丟過嚟!反而有錢佬冇咁大嘥,其實最浪費係中產嗰班,佢哋在生活上追求享受及炫耀,不斷消費又不停浪費,所以啲垃圾咪越來越多囉!」

見成班工友都做到身水身汗,於是有組員問垃圾站有冇俾工友沖涼換衫嘅地方,不過原來站內並沒提供有關嘅設施,甚至連更衣室都冇,只能在附近的公廁換衫。
組員聽完之後,都好坦承話過往只見到清潔工友係好辛苦,係一份厭惡性嘅工作,覺得佢哋好堅忍好捱得,但卻從來唔知道佢哋背後面對及承受緊,在外判制度下所遇到不公義嘅剝削及不合理嘅工作待遇。

而透過親身落區,走入街坊嘅場景,從聆聽與對話中才能夠作初步的體會,稍為嘗試去感受對方的處境,去認知內裡及背後與制度本身細微的脈絡和關係,然後才可觸動那份憐憫及同理心,慢慢逐漸與社區不同鄰舍的距離重新結連和拉近,就如昔日基督道成肉身,走進人群,活在他們當中,以生命與他們同行,用行動使被壓制的得釋放,讓被邊緣的重拾尊嚴。

趙日輝(關懷貧窮學校事工統籌)

留下回應

贊助連結
marksir 聖經考古

 

 

精選文章