關懷貧窮學校

在生命裡做教育,從教育中看生命 ;
進生活裡學關懷,在關懷中學生活 ;
見貧乏中思信仰,從服侍中學做人。

問下你自己 : 「你點解要讀大學?」

-100%+

近呢兩年多左做大專社關組嘅體驗訓練,逐漸認識多左呢一代嘅大學生佢地究竟點睇貧窮呢個議題,除左呢個議題外,更加令我地了解多左大學生讀書嘅心路歷程。

佢地對本地貧窮議題有咩睇法?我諗除左讀社工社會學嗰啲會有啲sense之外,讀其他科嘅同學仔對呢個議題真係好有距離,除非本身係基層,否則佢地平日嘅生活只有屋企去院校然後返屋企,就係咁簡單,亦可能會另外額外加上兼職或玩樂。喺生活裡面完全接觸吾倒基層又吾睇報紙新聞,其實成個人對社會都脫晒節,但係其實呢種氣氛由中學甚至小學已經開始醞釀同令人習慣,中學嘅密習式補課同好忙好忙嘅schedule根本就已經預備緊你個心要適應大學甚至出嚟做嘢嘅生活節奏,社會時事呢啲只要我吾係揀呢啲科就根本事不關己,己不勞心。總之順應個人主義嘅特色,搞掂好自己啲嘢先算,其他嘢留番俾其他人關注,貧窮問題就話知佢死,總之我就吾可以窮。我曾經問過一班大學生:「點解你要讀大學呀?」有個學生答我:「要脫貧囉!」,呢個答案真係精準,直情道出現實社會嘅哀歌,我地係吾可以窮架,因為會被社會否定架!你會成為一個冇人欣賞認同嘅人,係千古罪人,呢種將貧窮妖魔化,意識負面化嘅思維,從西方封建主義去到資本主義階級化嘅興起,都係深深植入喺我地嘅潛意識中。所以,你窮就呢一世冇運行,同學仔參與體驗領受到的只係吾關我事咪理,同埋以慈惠毒藥派派派嚟麻醉自己未能對社會有所貢獻嘅心態。

再同佢地討論到點解你會揀呢科嚟讀,有好多都會咁答你:「冇呀,佢收我咪讀囉。」,呢個答案突顯出何等的被動,甚至有啲吾在乎嘅感覺,但係佢地就係面對呢種狀況,雖然吾排除有同學仔好有理想咁入到自己理想嗰科,但比例應該吾會太多。你試諗下,一個根本吾會俾你有夢想同幻想嘅社會,對於渴望有新主意渴望有改變嘅年青一代嚟講,喺到生存真係無乜意思,因為社會根本吾俾你發揮,你嘅生活係社會塑造你嘅,你嘅身份地位以及成功取決於你合吾合乎呢個社會嘅標準,而你失敗就會被社會判為貧窮嘅失敗者,好似班基層街坊咁,試問,又點可以產生有活力求變嘅年青人?

其實有好多大學嘅學科,係喺好耐之前,一班宣教士憑住滿腔熱誠,為左改變世界而成立嘅,目的希望透過專門嘅研究,讓呢啲學問可以做福人群,貢獻世界。好似醫科,其中一個目的係不論貧富,都可以享用接受專業治療嘅權利,但現實好多國家都要你有錢先至可以有得醫病,特別係強國。讀經濟嘅,其中一個目的係希望諗方法同研究能令全球經濟體資源分配同發展可以均衡,吾會令某一方積財坐權太多,防止弱勢者永遠喺強權下被勞役同剝削,當然現實亦吾係咁理想啦。仲有好多學科背後都有其核心信念同價值,今日嘅大學生,又有幾多會去回顧番起初先賢帶俾我地呢啲咁重要嘅訊息同啟示?

本文簡短連結 http://faith100.org/OLA9P

留下回應

贊助連結
龔立人 - 在暗角言說上主

 

 

精選文章