倚天

塵世間一介無聊小傳道。

唔舒服,但唔後悔——睇「盧根」後感5/6

睇呢齣戲有種好特別嘅感覺,就係戲好睇,但好想快啲完。因為全戲都瀰漫住一種無奈但又好現實嘅感覺,唔想繼續,但又繼續。正如盧根一直袋住粒超能鋼子彈,想死,但又未死得,要繼續咁生活營營役役;因為,若果真係要提早離場,又會唔得捨,即使明知最後結局係點,都想睇埋落去。彷彿係一種生而無奈、死而有憾嘅無力感,心情沉重,要克服呢種感覺,先可以睇落去。(講得好似好誇,我當時真係睇到想走。)

電影結束,沉重嘅心情歷久不散,由於電影精彩、動人,所以即使睇嗰陣感覺唔舒服,但好戲係值得欣賞同令人回味嘅,睇完唔會後悔。

如果係一齣爛片,開頭差、中間悶、預計結局爛,仲要感覺難受,可能唔少人會中途已經離場。咁諗,或者我哋多少能夠明白,年青人自殺的心情。開頭差:出世無耐就發現自己喺Transigen計劃內面,無童年、無遊戲、無經歷,只有知識同技能訓練,返兩間幼稚園、被逼學非洲人都唔識嘅非洲鼓;中間悶:日夜無間不斷操練,返學操、放學操、放假操……仲要食ADHD葯先做得晒功課,悶之餘,仲有被操練,要打毒針維生嘅痛苦;結局呢?大家都知伊甸唔存在,努力落去,又有咩用呢?你以為呢個年代,真係努力就會發達?咪咁天真啦!

如果開頭無咁差,中間無咁悶,又或者感覺無咁差,都會令人對結局有多少少期待,無咁易放棄離場。如果有可以回味嘅童年,有能夠學習又有趣味嘅經歷;有啲自己有興趣嘅嘢,唔係日日TSA;有明白同體諒自己嘅長輩,著重佢哋呢一刻嘅成長同經歷,而唔係將來可以賺幾錢……或者咁,有更多年青人能夠對將來有返啲希望,唔會擇選提早離場。

留下回應

贊助連結
龔立人 - 在暗角言說上主

 

 

精選文章