梁榮光

擁抱三一信仰,踐行多元中的合一。深信沒有多元的合一,是浮淺,甚至是虛假。

反政治也是政治

政治

我以為邪惡嘅政治鬥爭,教會唔好搞;講出政治鬥爭中嘅邪惡,教會要。

政治既敏感又惹火。因此想「食安樂茶飯嘅」(我也想),總想迴避它。自己不想談,也不想別人談。不過,不想談,也是政治取態;要求人不要談,甚至是清楚的政治訴求。亞里斯多德的經典著述《政治學》,開始部份就說:「人依其本性乃政治的動物」。政治在講人如何共處!除非荒島上只孤身一人,否則,不談政治,等同不談生活,不談生活,那還是道成肉身的信仰嗎?教會真的不該說政治?

「食安樂茶飯嘅」幾個粵式用字加上引號,也反映著政治受壓後的結果,就是視粵語為非主流,甚至不合法!在香港寫文章何解需要加引號?平日說話可否用粵語?原來都是政治考慮。君不知九十年代末開始,廣州中小學校開始出現禁止學生在校期間使用粵語的做法,違例者可被減扣「道德操行分」。原來生活中用上甚麼語文,也離不開政治!

陳惜姿從女兒的小學五年級課本中看了《永遠記住:這一時刻》,「說的是汶川地震時譚千秋老師奮不顧身將開雙臂救活四個學生、自己卻不幸身亡的事跡。」跟住佢又話呢個係共產黨文宣嘅手段,題目「文宣成了課文」真係擺明車馬!佢嘅政治判斷未必個個人啱聽,但係佢嘅跟進研究就不妨聽下:「我在電腦搜尋『譚千秋』,證實真有其人,但其捨身救人的故事卻引起論爭。譚老師的事迹首先被新華社記者報道,文章稱:『他像童話裏的天使,張開雙臂趴在課桌上,身下死死地護着四個學生。學生得救了,他卻不幸遇難。』譚千秋成了救人英雄,獲封烈士和全國抗震救災優秀共產黨員。」後尾,陳舉證話「兩年後《南方都市報》揭發報道造假」,指《南》訪問咗劉虹利,「劉指站在講台的譚老師與自己相差兩米,他根本無法接近自己。譚老師身亡和自己獲救,實無關係。」陳喺明報發表呢篇文章,係咁結束:「女兒朗讀完了,我忍不住告訴她,地震的地點、時間都是真的,但文章內容是假的。她有點茫然,但我不得不說真話。」「真話」係乜?係道德嘅嘢呀,講真話,基督徒搏哂老命都要做嘅嘢。我唔係好識政治,但知道少少良心。

施洗約翰冒死都直斥所屬領土嘅特首希律樣衰衰嘅嘢(太十四),至於耶穌,講道以外都爆咗兩句映射下呢個政要,話要小心佢,佢有酵(可八15),仲叫佢做狐狸(路八20),咁樣叫法嘅震撼力直逼將宜家賣嘅狼公仔比作梁振英差唔得幾多。我以為邪惡嘅政治鬥爭,教會唔好搞;講出政治鬥爭中嘅邪惡,教會要。

留下回應

贊助連結
陳韋安洪麗芳 寫給你心中尚未崩壞的地方

 

 

精選文章