關懷貧窮學校

在生命裡做教育,從教育中看生命 ;
進生活裡學關懷,在關懷中學生活 ;
見貧乏中思信仰,從服侍中學做人。

你吾讀好啲書大過就好似佢咁架啦!

-100%+

今日去左小學教嘢,講堅,你話中學生好玩啲定小學生好啲,咁小學生就一定個反應好啲嘅,因為還有少少童真同想像力,做劇場佢地都會俾倒多啲反應你。話說我地嘗試做左一段仔嘅劇場,係講有個家長拖住個女遇到個無家者,然後阿女問家長訓喺倒個人喺到做物,家長就乘機做親子教育,教個女記住要勤力讀書,如果吾係就好似佢咁訓街架啦。(我想講,呢段戲,吾係作出嚟,而係喺真實嘅環境當中遇過好多次咁嘅情況,係真人真事嚟嘅。)

做完呢段後,就開始以提問式嘅方法同班同學仔討論下剛才一幕嘅訊息,用呢種提問式教學有個風險就係你控制吾倒學生會俾啲咩反應你,同埋你點樣去回應番佢同樣重要,你講嘅佢可以吾認同,佢表達嘅又可以叫其他參與嘅人一起去討論,然後再了解大家嘅想法,喺當中嘗試取一個平衡嘅觀點,正正我地就係需要有呢種元素去令到同學仔可以參與其中,喺呢個環境裡面甚至可以將佢地思考嘅層次推高到批判性嘅層面,呢啲都係我地好想見倒同經歷嘅,咁樣去討論先至精彩,亦令我地吾再以權威及家長式向度嘅教學去限制同學仔嘅思考。

講番劇場嘅片段,當問到佢地個家長同阿女講嗰句說話,佢地平日有冇聽過,全部都舉手話有,咁再問佢喺邊到聽番嚟架,你估佢地點答?係九成都係喺自己父母個口聽番嚟,而另外嗰一成係喺父母個父母同吾同嘅媒體聽倒,講到呢到,見老師喺背後冷汗直流。其實呢一班同學仔嘅回應正正反映左一個事實,就係我地對某些群體有一種既定嘅想法,呢種想法可能帶住一份判斷(Judgement)同標籤(Labelling),但係問到點解佢地會有咁嘅睇法呢,就係冇原因亦無任何理據播,只係人云亦云,人講我又講,又或社會刻意為佢地塑造形象同意識形態,嚟鞏固某種佢地守護嘅價值觀同生活模式,認為吾係佢地嗰類人就必須除之而後快,或刻意排除佢地喺社會嘅邊緣位置。一位無家者,係吾係真係因為冇用而訓街呢,我相信理性同有同理心嘅人應該吾會認同,亦吾駛喺到講大道理,但點解家長要咁教呢?其實家長要針對嘅根本吾係無家者,佢亦冇特登去抹黑佢,因為佢只係利用佢借呢個機會去教育佢個女發奮向上,無家者嘅故事同生死佢根本吾care,只係一個機會可以借題發揮姐。

成個鐘頭其實同學仔講嘅嘢好有point,其實佢地呢個年紀已經接觸倒好多嘅資訊,同佢地傾貧窮,佢地已經去到扶貧政策同貧窮線嘅層次,唯一需要去深入啲分享嘅,係操佢地嘅靈性,「尊重」,「體諒」,「放下偏見」,係最後從佢地口中學番嚟嘅。所有關懷同關注嘅開始,都可能係始於人類靈性嘅啟發,喺人性品格嘅培養中得著靈性,其實無論大小朋友都需要。

關懷貧窮學校生命教育主任鄧永謙
本文簡短連結 http://faith100.org/jm0BJ

留下回應

贊助連結
鄒永恒:教、學、人生

 

 

精選文章