倚天

塵世間一介無聊小傳道。

人到中年——睇「盧根」後感4/6

開場一段,一拐一拐行出嚟,對住幾個小流民,被打到遍體鱗傷,即使最後勝利,但又點似嗰個喺千萬軍中取敵首級如探囊取物嘅狼人呢?

感受自己身體衰殘,退化,體力不繼、反應遲緩、老眼紛花等等,大概係每個人三十幾四十歲開始,都要面對,而且係一直到死,情況越嚟越差。即使唔係普通人,有異能嘅都要。最令人沮喪嘅,唔係身體每況愈下,而係要負嘅責任亦越嚟越大。本來一個人輕輕鬆鬆,但屋企有個九十歲嘅X博士、唔見得光嘅卡利班要照顧,搵錢買葯都唔易啦,忽然仲話多個女要照顧,仲話要逃亡,咪玩啦!博士仲成日問有咩使命、貢獻、為下一代乜乜物物,搵食已經好辛苦,仲講呢啲?

人到中年,其實真係幾辛苦,責任重、壓力大,盡晒力,睇住自己就越嚟越殘。又有咩辦法?盧根正要話俾你知,幾鋒利嘅刀都有生銹嘅一日,超人亦會殘會死,以前幾勁都一樣。但一路感受住而己退,而目前呢一刻,屋企有老有嫰要照顧、保護,想死都唔得閒。唯一開心嘅,就係FF買遊艇出海曬太陽。

但即使幾辛苦,幾唔情願,盧根默默耕耘咁工作,過住沉悶嘅生活,因為世上仍然有值得佢照顧、保護嘅人。或者每個人都一樣,知道有呢個(啲)人,就願意承擔起呢個責任,做討厭嘅事,甚至不惜一切,犧牲自己。

你要照顧、保護嘅人喺邊?

留下回應

贊助連結
陳韋安洪麗芳 寫給你心中尚未崩壞的地方

 

 

精選文章