Bilibala

Billy 一個喜歡每日多讀一點聖經, 神學未有耐畢業的讀經人,喪食"雜糧"的書蟲,自成一格的詞人 + 口水佬.
身在加拿大多倫多,自以為炒股勁過不少財經演員的投資人,日頭兼職做會計師, 為某銀行的國際業務做分析.

一個耶教徒的告白(3) 我最尊敬的人 梁特首

近幾年,中港矛盾不斷惡化,香港人就政改分裂成 1) 多一事不如少一事順其自然唔好阻住人揾食的藍絲,以及 2) 無懼違法也要抗爭爭取真普選的黃絲,就連香港教會也無一倖免地出現撕裂.

但無論你是藍絲, 黃絲,還是仲係度心思思. 從民意調查顯示,不滿現屆政府管治,不滿特首梁振英先生的人數比例,佔大多數而且與日俱增.

在這當口,竟然有學校老師要求學生以”我最尊敬的人(特首梁振英)”為題目作文.

150211-primary-school-writing-lcy-726x400

(這是 Bilibala 塗鴉亂吹之作文,認真就輸左, 但笑下又能反思一下,大概亦有益處.

細個作文,每次都係僅僅合格,印象中只有兩次最高分,而我最高分係得70分. 我媽咪感動到,到依家仲記得果兩篇文講乜: 一篇幻想自己係阿蛇,一篇幻想自己係隻烏蠅.

而呢一篇係幻想自己係個自圓其說又阿Q既耶青.
休怪重口味!)

用心良苦
要知道在辯論比賽中,不管你個人觀點如何,你若是代表正/反某一方,就要放下自我立場,拚命舉出論點,理據,辯詞,偽術和各個例子來悍衛那辯論觀點.

那些老師期望那班”嬌生慣養”的小學生能放下身段,作多角度思考去述說一個民望低企,政績乏善可陳的特首如何值得尊敬,可謂用心良苦!

某些學生唔肯用腦,只懂潑婦罵街,得28分實在係咎由自取的.
十隻手指有長短,你專㨂最短的去說三道四,在社會釋放負能量,有什么益處?
見到人家眼中有剌,卻見不到自己眼中有樑木,你將來點做社會既楝樑? 點做到好似劉江華議員楝樑咁周街無所不在咁楝係度呢?

修養態度
尊敬係一種待人接物的態度. 即使對方不偉大,即使人廢立場又廢,什么都做出個大頭佛,或者淘空百年儲備,你仍可保持一份尊敬. 所以你鬧爆佢,粗口佢就係你唔岩.

就算人家真係衣冠禽獸,你都不能那樣,你去動物園,你會同獅子老虎,狼啊,鷹啊這些動物講粗口嗎?不會嘛!通常尐大人細路會走到籠前扮狼叫,扮獅子叫,引佢注意,佢當然懶得埋你啦!畜牧點識聽人話架?就算佢地將成群羊連骨都吞左,你應該覺得精釆,睇到場 live show, 假如你向佢爆粗同擲蕉,反而被人話冇愛心甚至告你虐畜,come on, 好正常喎!

順服掌權
若然你係一個耶青,就更該如此保持一份尊敬,因為保羅話不可毀謗你百姓的長官(徒23:5,註一),又話信徒要順服在上的掌權者,凡對抗掌權者就是對抗神(羅13:1-2),所以,一個耶青尊敬特區首長才是順服神的表現.

雖然 13:3-4 話作官的應是叫行惡的懼怕,而不是叫行善的懼怕,而且叫升斗市民受惠得益. 可是梁特首從頭一天直到如今,是令越來越多人恐懼,錯判和內㡱,連慈母都要站起來話55歲退休唔all right, 連慈母都撈不到益處,升斗市民更是叫苦連天,反而惡人就越發肆無忌憚,無法無天,慈母都要忍讓三分,老廉亦唔敢出帖請佢地飲咖啡.

當一個掌權者跟羅馬書13章形容的有如此大出入時,作為一耶青又是否仍該順服和尊敬他呢?
我想仍是必需的.

第一,牧師講道從不解釋第三節第四節,就算有亦只是一句起兩句止;

第二,主日學老師從不叫我背這節經文,我亦從未找到金句咭引用過它. 雖然有極少數異見牧師如曾思瀚博士解釋過,但我相信這絕不能代表七百萬(居)香港(的中國)同胞所理解的聖經.

所以第三四節不比第一二節重要,係有科學,客觀和經過廣泛咨詢的結果. 更何況我只不過係個小市民,小耶青,我就照聖經的教導去順服同尊敬掌權者,難道有錯么?掌權者出錯,我會為他們祈禱,求神給他們智慧,整治得香港貼貼服服,就算出個掃羅,亞哈,行神眼中看為惡的王,只要我祈禱,神會出手對付他,我有信心呀!

與眾不同
梁特首值得我尊敬的地方著實不少.

1. 為了拯救香港良心,可以將通訊局和勞工局的建議留中不發.

2. 香港憑著主佑神洲的恩賜,多年以來也是世界金融大都會,國企上市,什么互通深通,每年得恩賜有成萬億的集資令香港人心高氣傲,紙醉金迷,忘掉祖國的恩典. 但即使香港如此架勢,梁特首仍然存心謙卑,順服,不以香港與紐約倫敦齊名為強奪的,反倒虛己,取了68狗的形像成為奴才的樣板,把香港整頓得像個三四線城市. 看深圳比自己強,又從不單顧自己的事,顧念別城的事,這份虛懷若谷,謙恭友愛不值得你學習么?

3. 顧念別城是有實幹的例子可供証明: 為了促進同澳洲的連帶發展,雖然只收到5000萬還而捱罵也樂此不疲. 當年大衛南征北伐,油水都唔少,也會分別為聖的上繳與聖殿的主,這是他愛主,神祝福的確據呀!
你教會牧師都將大衛讚到天上有地下無,他當然尊敬特首.

大衛為主作工,是張揚出去,要得別人稱讚,我們尊敬的特首許多事都作在暗處,為得阿爺稱讚,豈不更得蒙悅納嗎?

你做耶青,事奉主有幾多是暗暗的為主?

唔好比我睇死,你多半是求人比 like.
這樣我們尊敬的特首可謂與眾不同,能人所不能.

我認. 我寫這篇文,都希望你比個 like, 跟手share出去

在這方面,我不如梁特首也!

4. 保羅話過,已經將萬事當作糞土,為要得著基督. 梁特首能視民望如浮雲,香港發展前途如糞土,忘記背後,努力面前,向標竿直跑,為要完成阿爺所交託他的任務.

我知你會話特首先生其實係講金,而你同一班信徒係講心. 那請你攞出你出於信心愛心的行為來見証如何扑心扑命為主啦!人家特首雖成事不足敗事有餘,但有行為有表現呀

自我審查
好似耶穌鬧爆班法利賽人咁,照下鏡睇清下自己個死樣.
1. 呢個係稱為禱告的地方,你地將佢變成中產俱樂部.
2. 你地話讀經只是頭腦知識算不得什么,一人一球建教會才重要
3. 的的摩摩唔爆粗,唔好遲到,唔好冇到,唔好 say no to 教會既事奉,唔食煙飲酒唔衝紅燈你地就做足,社會公義你地就用什么狗屁合一做借口,一聲不響
4. 同性關係所衍生的社會家庭問題你地就有理冇理用盡諸般智慧與資源反對,憐憫與關懷弱勢,止息中港社會矛盾的政策你地就只會祈禱祈禱然後散會.
5. 你地做帶領睇唔清,仲要強制其他人跟你地果套. 話反對者冇信心,攪分裂
6. 人家特首就算係真小人,但你地係粉飾既墳墓,係偽君子. 那個比較值得尊敬呢?

以賽亞書話
牛認識主人
驢認識主人既槽
連68狗也認識阿爺既心意
我既百姓識條鐵咩.
用嘴唇稱讚我,用 facebook 俾 like 我,心卻遠離我,該做既唔做,唔該做既反而想做就去做.

這樣看來,特首真值得我們一班耶教徒尊敬啊! 不但如此,作為學習對像也不為過呀!

註一
保羅用毀謗而不是鬧爆,是否意味只要有理據和事實,就可以鬧爆呢?我讀得聖經少,唔識解!

Reference:

大埔舊墟公立學校小學作文 最尊敬的人指定梁振英

留下回應

贊助連結
marksir 聖經考古

 

 

精選文章