《耶教能人》

《耶教能人》是一本實體雜誌,結合社交網絡以毒攻毒,用神學荼毒被耶教長期荼毒的信徒。命名為「耶教」,是因為編輯團隊認為耶教與基督教在教義上衝突雖然不大,但耶教教徒「不加思索」的信仰態度,卻足以影響信徒生活見證。所以希望透過文字揭示「耶教」弊病,引導信徒反思。《耶教能人》實體雜誌訂購表格:http://goo.gl/forms/JVdey5VEB3。

【慘變民間宗教﹣鄧公專訪(一)】

tang1_faith100

茶餘飯後和編輯團隊閒談吹水之餘,大家有感耶教內充斥著好多似是而非的壞鬼神學,慨嘆壞鬼神學將原本豐富非常嘅基督信仰,淺化成為一般傳統民間信仰無異!為此我地決定深入香港浸信會神學院,向素來對神學、信仰同文化深有研究嘅鄧紹光教授(鄧公),求取壞鬼神學嘅「解藥」。
喺一個陽光仍然非常猛烈嘅黃昏,我地熱死㷫㷫咁走去西澳搵鄧公。鄧公果然平易近人,一身T恤短褲來迎接我地,裝束雖然輕鬆,但一開口,絕對不饒人。

記者:你覺得而家耶教教會啲神學有咩問題?
鄧公:基督教今日嘅偏差最主要唔係教義問題,而係我地思考信仰時拿捏得唔準確。我地好多時都唔識得點讀聖經,只係當佢係一本金句百科全書。呢個涉及到教會對「聖經論」嘅理解,無論西方定華人教會,都係令人頭痛嘅問題。

更加多嘅基督徒將自己assume嘅信仰當成基督信仰,冇認真持續思考聖經,教會裡面好少人進入understanding或者thinking過程,佢地習慣直接接收牧師講嘅嘢,祈禱又祈到好似稟神咁,根本係將民間宗教思維直接套入。

記者:咁我地應該點樣可以正確啲看待聖經呢?
鄧公:聖經係一本上帝在地上工作嘅書,亦係見證上帝將來終末完成嘅書。今日我地唔可以離開聖經原本嘅context,而就走去宣講和教導,咁樣係唔尊重聖經,亦唔能夠全面見到上帝嘅工作,連貫唔到創造、救贖和終末嘅完成。因而對理解聖經產生割裂,甚至落入斷章取義嘅危險當中。

就好似好多信徒覺得有新天冇新地咁,以為終末時啲靈魂會係到飄下飄下,就係因為佢地唔睇連貫性工作,結果就好似睇電影唔睇結尾睇開頭咁,只理耶穌釘十字架,唔理復活同盼望,咁樣拯救論咪出錯囉。唔理連貫性,就好易變成唔理創造嘅異端「諾斯底主義」。如果基督徒相信終末係只拯救靈魂而唔拯救肉身,就會影響佢地在世生活嘅行為,所以佢地咪會唔講環保、唔愛惜自己身體。

記者:一個有趣嘅發現,耶教牧師普遍都受過神學訓練,點解都會落入「金句式」解經嘅危險呢?
鄧公:呢個係在乎牧者有幾多時間去預備一篇講章呢?而係牧養過程中,教會又點樣看待同重視宣講、教導上帝嘅話語呢?教會在此需要好好反省。

鄧公專訪 系列
  1. 【慘變民間宗教﹣鄧公專訪(一)】
  2. 【三一有幾奧秘?﹣鄧公專訪(二)】

留下回應

贊助連結
陳韋安洪麗芳 寫給你心中尚未崩壞的地方

 

 

精選文章