倚天

塵世間一介無聊小傳道。

「我討厭開槍」——睇「盧根」後感3/6

盧根講過佢討厭開槍。筆者無睇呢個系列之前嘅電影,唔知有無講過佢有幾咁討厭,又唔知同佢個名「no gun」有無關,但佢今集有講。成齣戲,佢中咗好多槍都無開過一槍,直到最後,佢發現「掠奪者」追捕緊班Transigen嘅變種細路,想追上去幫手。但體力不繼,要打毒針提高能力,可惜葯力有限時,追到上去,葯力已過,盧根已經企都企唔穩。佢就喺一個死人身上執起一把槍,趁敵人唔為意下連開兩槍,一槍打死桑德。萊斯博士(Zander Rice),一槍打斷唐納。皮爾斯Donald Pierce隻改造手臂。如果唔係為救蘿拉(同班細路),或者佢情願死都唔會開槍,反正佢已經諗住最後一槍,就係了結自己。但為咗自己嗰女,為自己珍惜嘅人,做一件自己討厭嘅事,感覺係無咁討厭,因為覺得值得。

呢次,仲抵反晒。可能正係因為大家都知道盧根討厭開槍,萊斯同皮爾斯事前完全無諗過佢會忽然開槍,所以呢兩槍亦能夠另形勢逆轉,可以控制X-24嘅萊斯死咗,皮爾斯失去改造手臂變成普通人,班異能細路就有機會戰勝失去主腦嘅軍隊。

父親為女兒不惜一切嘅故事並唔只呢一個。但呢個故事入面,蘿拉唔係真係盧根親生,又唔係佢養大,但電影後半段,盧根已經忘記咗,幾日前佢仲係好討厭蘿拉,唔想理佢,任由佢畀人捉走。或者有人講,當時佢唔知蘿拉有佢血統;又或者經歷過幾日同生共死就會產生感情;再唔係諗咗幾日,終於都接受到自己做咗人老豆。但由女兒出現嗰一刻,就係人生一次重大轉變。以前討厭嘅事,或者轉瞬間就無咁討厭。

感情變化之快,可能真係無小朋友唔會明。

留下回應

贊助連結
龔立人 - 在暗角言說上主

 

 

精選文章