馬斯特

係咁架啦,好出奇呀 -- 黃子華

《在教會單身沒有女》系列四 之 又玩集體遊戲

原刊於馬斯特medium,2020年3月14日

20180919054837789

上回講到我見到異像,見到個Single camp本booklet,個Camp三日兩夜咁話。

通常呢類camp會放係long weekend,五六日或者六日一。第一日,好似我咁,身為一個資深單身信徒,已經唔再年青,當然唔會一大清早仆入camp啦,平日返工咁辛苦,老虎訓晏啲,甚至入camp果日仲要返工,要放咗工先黎得。呢呢路路之之佐佐,仲要等埋遲到果班,過咗食晏時間先入camp,Hea一輪分個靚組,分下房。下晝頭炮當然係玩破冰遊戲,比一班原本已經係教會玩咗十幾年破冰遊戲的弟兄姊妹再玩多次或比人玩多次,知道下人地個名,幾時生日同埋做邊份工。

由於我係一個內向者,真好唔明,教會團契搞乜活動,無論查經、專題、唱詩、戶外活動,硬係要鍾意玩破冰遊戲,如果係自己堂會的話,佢地本來識左十幾年,個個星期都見一兩次面,仲邊有冰比你破。地球暖化,北極都就黎無冰山啦,仲破冰。

雖然我真係好憎玩集體遊戲,有時候係聯教會活動,有啲人真係唔識,多多少少要有啲熱身,有時候要出黎行走江湖應酬交際真係無辦法,儘量都會畀面參與下。但主辦單位會唔會認真咁考慮一下遊戲內容同設計,會唔會啱唔啱一大班人玩呢,對住一班人廿幾三十到四十歲嘅職青同職中,返完五日 or 五日半工命無左半條,仲要佢地大熱天時跑黎跑去玩D競技活動、歷奇遊戲、野外定向咁呀,然後成身臭汗坐係到分享,係唔係真係work呢。年紀大,大家社交相處模式完全變咗,可能更加享受係有冷氣嘅地方坐低飲杯咖啡吹下水。

例如,有個遊戲我真係嚮教會活動玩過好幾次,唔知遊戲有無名,讀者如果知道的話請提供。個玩法係用你個人名,配一個動作,當有人叫你個名,同做你個動作時,你就要應機,叫另一個名同做相關動作,射返出去,如此類推咁,當所人有個名都比講過一次後,遊戲就完。背後目的,當然係最低限度令你記得人個名啦。如果係一個細組入面,覺得大家唔係咁熟,十個八個人咁玩,破下冰梗係得啦。

咁,大家估下我試過最多幾多人咁一齊玩,十個?唔係!二十個?都唔係!頂晒籠咪三十個?都唔係!係四十幾人呀!係四十幾人呀!係四十幾人呀!淨係每個人介紹自己同整個動作出黎,加埋中間扭扭擰擰果啲,已經用左十幾廿分鐘!短時間要我記四十幾個人名同動作,咁其實係比我地互相認識,定考我地記憶力呢!如果有人得嘅話,可以咁短時間記得晒所有人D名同動作,去參加奧林匹克記憶力挑戰賽啦!贏左分分鐘仲有獎金添!最多咪記到本來熟果幾個。由於太多人大家都真係記唔到丫嘛,咁個遊戲好自然玩兩野就斷,擾擾攘攘一輪當玩完啦。咁我呢,係三十幾四十分鐘入面,只係度咗個動作,同講咗自己個名一次,然後企足咁耐,試問咁為咩呢,你比我玩遊戲定玩我呀!

一直覺得,你想知人個名或者基本資料,只要你有一定社交技巧,行過去搭訕吹兩句水問下,大約分半鐘都問到返黎,不過寫文我叻啫,集體遊戲呢D野,我識條鐵麼!

留下回應

贊助連結
marksir 聖經考古

 

 

精選文章