馬斯特

係咁架啦,好出奇呀 -- 黃子華

《在教會單身沒有女》系列五 之 慾火攻心

原刊於馬斯特medium,2020/03/21

photo

上一回講到,大家身水身汗玩完啲歷奇活動、野外定向、集體遊戲,夜晚靜態啲,通常會安排一個查經,熱門經文會有:

「那人獨居不好,我要為他造一個配偶幫助他。」

「人要離開父母,與妻子連合,二人成為一體。」

「愛是恆久忍耐………」

「先尋求祂的國和祂的義,這些東西都要加給你們了。」

「沒有娶妻的,是為主的事掛慮,想怎樣叫主喜悅。」

「因為凡祈求的就得著、尋找的就尋見.叩門的就給他開門。」

「你們得不著、是因為你們不求。你們求也得不著、是因為你們妄求。」

「信與不信不能同負一軛。」

「神所配合的,人不能分開。」

「與其慾火攻心,倒不如嫁娶為妙。」

真係好唔明,點解一個 so called 單身事工會用最後呢句,即係點呀,叫個弟兄對住玩完破冰遊戲,好不容易咁知道新認識嘅姊妹原來叫Mary,然後聽道要行道,拎住呢句經文同人講:「呀Mary,雖然我啱啱識你,不過我而家慾火攻心喇,你考慮吓我啦!我地而家去註冊,今晚就洞房,都係唔好喇,我慾火攻身,不如而家洞房,之後補註冊擺酒啦!」

而個姊妹會覺得,呀,好浪漫呀,好感受到被愛,覺得呢位弟兄好屬靈好熟聖經,終於等到上帝為佢安排果一位,然後同佢洞完房後嫁咗比佢,幸福快樂咁生活落去,咁呀!

再唔係,通常會請一對教會內嘅模範夫妻,分享佢地幾十年黎相處之道,點解佢地幾十年黎無嗌過交,同你講佢地點樣從來無諗過會娶/嫁對方然後走埋一齊,完全係由神保守帶領。結婚之後點樣係平凡生活中增加情趣,同你講結咗婚之後,大家追求唔再係愛情,而係感情,大家係一家人,彼此唔係情侶,而係家人。但生活上嘅小驚喜同情趣又唔可以無喎,例如係枕頭底放份小禮物,得閑去拍下拖去海邊睇日落,最緊要當然仲係第日有小朋友後,老婆唔好掛住湊仔而忽略老公,令小朋友變成第三者。兩公婆係生仔前一定要傾好有共識,小朋友日後教育係點安排,如果想生小朋友的話,老婆係頭果幾年儘量留係屋企唔好出去打工。順帶提下婆媳糾紛點處理,結咗婚最好唔好一齊住,樓價永遠向上升,自己供得起儘快買,唔好望樓價會跌。

聽完呢D野真係令人黑人問號,去得呢類教會單身事工,好多人成三十歲仲係A0,唔係教人點突破困境,擴闊圈子,點同異性相處,或者糾正啲騎呢古怪嘅戀愛觀念,反而對住班A0講夫婦相處之道,甚至係親子教育、婆媳關係,實際係咪想串佢地架。即係等於對個無車牌嘅人,去sell架車有幾好咁,架車有幾好有咩用啫,我又唔揸得,牌都未考諗咩買車呀,我係想知點樣可以考到個牌返黎先。

夜晚,大家年紀都唔細,當然無辦法再好似後生咁,傾偈傾到半夜三更,夜晚沖個涼瞓啦。

留下回應

贊助連結
陳韋安洪麗芳 寫給你心中尚未崩壞的地方

 

 

精選文章