馬斯特

係咁架啦,好出奇呀 -- 黃子華

《在教會單身沒有女》系列二 之 究竟搞單身活動定係自我形像提升工程

原刊於馬斯特medium,2020年2月21日

黎緊幾篇講下教會關於單身事工嘅內容設計。

一直有個好深嘅疑問,教會內呢類 so called 單身事工目的究竟係咩?

你以為佢地真係會諗住幫你做配對,幫你搵到上帝命定果一位?我去過咁多次,又真係從來未試過有半點配對matching的氣氛,甚至有時大家仲會不期然咁男女分開坐。對較大齡單身者直接對佢地講要點面對日後嘅獨身生活,要養貓去邊到領養好?又未試過真係咁殘忍。

所以,好似上次一篇咁講,不止一次試過出席類似嘅活動時,內容係完全圍繞住認識自我,愛錫自己,明白神好愛我,教我地講野要望人,做人要有自信要有目標諸如此類,關於住提升自我形象嘅內容。

咁搞法,不如唔好叫做單身事工啦,直頭叫提升自我形象事工啦,因為即使拍咗拖或者結埋婚之後,一樣需要認識自我同愛護自己同講野要望人咩,呢堆野內容實在係老少咸宜,居家旅行,殺人滅口必備,無話單身人士特別適用。

當然,我日後明白咗,如果有人同你講,脫離單身的最佳方法,係專注自己,發展潛能,培養新興趣,擴展社交圈子,學習同異性相處,體貼別人需要等等。其實係兜個圈話緊你好樣衰,無辦法單從外表吸引異性,無返十八般武藝有車有樓唔駛旨意。

相信暗啞底參加者唔多唔少係想搵到對象,多多少少希望見到啲配對活動,但搞手從來唔會可以放上水面搞,唔會明刀明槍咁做。所以活動嘅設計係好騎呢,永無話會明目張瞻單刀直入大鑼大鼓,幫大家互相介紹同做配對。即使參與者有拍拖談戀愛、組織家庭、恨娶恨嫁嘅想像同需要,主事人絕對唔會話整個table for six,搞speed dating,直接比佢地相睇,或者有意無意嘗試搞任何穿針引線嘅活動,有時更係開宗明義信誓旦旦話比你聽呢個活動唔係比你黎搵對象。

唔少時候,更加會從創世紀創造神學講起,講點樣那人獨居不好,二人要成為一體,所以你地千祈唔好搞同性戀,人總係要結婚。然後講到去保羅書信,人不嫁不娶倒好,信與不信不能同負一軛。再引三五個心理學理論去分析,同你講下love languages、愛的三個元素、馬斯洛需求金字之類。最後講埋末世,回到天家時人不嫁也不娶,好似天上使者,證明婚姻乃係暫時,獨身先係永恆。

講完散水,各自返去祈禱等候。

留下回應

贊助連結
龔立人 - 在暗角言說上主

 

 

精選文章