大專基督徒日報

一個屬於大專基督徒的網上日報,互相分享信仰、生命及資訊。
網址:https://www.facebook.com/collegechristiandaily/

由香港基督徒學生福音團契(FES)團契部 管理

《「道」是難走,但比起你的夏慤道 — 請講一篇好道給612新世代》

作者:Gigi,包包,國臨,阿鏗(FES暑期實習大專生)

是咁的,當社會各界群起反對修例時,當103萬人嘅遊行喺某啲生物嘅眼中如同「幻影」時,當”Sing Hallelujah To The Lord” 逐漸取代緊《主能夠》成為香港基督教會嘅標誌時,當年青人為社會前途挺身而出但係無辜受害時,當手無串鐵嘅人被抹黑成暴徒時……呢個,係一個黑暗嘅時代。而如果呢一刻教會繼續將社會議題視若無睹,對年輕人而言,呢個教會將會為佢地帶來再一次嘅失望。

嚟緊6月16日,除咗係第二次「反送中」大遊行同父親節外,亦都係主日,香港嘅眾教牧究竟可以點樣回應呢?實際啲講,我地又期待緊眾教牧點回應呢?

(利申:我哋都只係一班大學基督徒,冇受神學訓練,冇寫過講章,冇講過道,只係想表達一下作為香港嘅年青信徒呢一刻咩感受、諗緊咩。以下嘅所謂講章、講道「建議」,只作參考,排名不分先後,求主感動你。)

安慰

經過612之後,唔通大家仲有心情喺度嘻嘻哈哈咩!相信有小小關注呢件事嘅人,無論係咩立場都好都會有啲傷心、憤怒,又或者激動。喺呢個時候我哋都好想聽到教會回應返呢個情緒,而以下嘅講題我哋都想聽下嘅:

哀慟嘅力量 : 到底我哋應該點哀傷?哀傷係聖經入面又點睇㗎呢?

身分嘅衝擊:「去咗金鐘我就變咗暴徒?明明我都係為香港咋喎!」「當差嘅我又做咗衰人?明明我都係打份工咋喎!」相信呢幾日發生嘅事都令大家嘅自我身分構成好迷惘,我地都好想知係聖經入面又點睇呢?

黑暗中的盼望

而家正直歪曲勃謬嘅世代,基督徒應該有點嘅盼望呢?而呢啲盼望又從可而嚟呢?我哋又盼緊啲咩呢?從聖經中受壓迫嘅故事, 我哋可以得到啲咩啟發?從實際嘅抗爭方式, 到心態點樣喺困境自處, 我哋點先可以喺黑暗中仍存盼望?審判同世界嘅修復又同我哋嘅盼望有咩關係呢?而可能我哋成世人都見唔到公義喺香港呢個地方彰顯,呢個時候,我哋又應該以咩嘅心態去見證福音?

舊約嘅先知: 面對外族、崇拜巴力嘅王、以色列亡國

新約嘅耶穌、使徒: 面對羅馬帝國、面對徒有宗教外衣嘅以色列人

盼望不至於羞愧。我哋嘅盼望珍珠都冇咁真,因為我哋所盼望嘅係創天造地、 統管萬有嘅上帝,所以我哋嘅盼望一啲都唔膠!唔該將盼望「去膠化」!

我們在天上的父

呢幾日,相信大家祈得最多嘅就係「願神國降臨」、「願神旨意成就」,因為呢個無情、暴力嘅時代。我哋可能同新約時代嘅猶太人一樣,渴望彌賽亞降臨。就喺警察向一位牧師講「叫你個神落黎見我哋~」嗰時,牧師會唔會都諗「大家咁話」?我哋求神國降臨嘅時候,當神係咩?

到底上帝嘅屬性係點樣㗎呢?佢係一個憐憫嘅主?定係一個管教民眾嘅慈父?
對比神所做嘅嘢,其實我哋咁廢,有冇可以模仿嘅地方?

神完美嘅靈,我哋有冇遺傳到幾多?
神有冇教導我哋,有咩方法可以解決面前嘅困境?

我哋因罷工罷課而受罰,甚至被控以暴動罪名,神有冇又點樣賜我哋足夠嘅供應呢?

近排唔知點解興自稱「慈母」?究竟聖經入面有冇「慈母」呢?佢地係咪會毒打同揾槍射自己嘅仔女呢?我哋只係知道,神係「永在的父」。父子嘅關係,喺聖經裏面,應該係點?

基督徒的回應?

除咗祈禱、Sing Hallelujah To The Lord、開放教會、教牧擋住警察外,香港基督徒可以做啲咩?

耶穌傳道嗰三年,佢所做嘅,會唔會啟發到我哋?可能係耶穌憐憫困苦人?耶穌醫治病患者?耶穌潔淨聖殿?耶穌哭了?耶穌責備法利賽人?耶穌為義受死?…………

這是一個黑暗的時代。願真光普照。願祢憐憫我們。願祢公義降臨。

我哋真心想聽一篇「好道」嚟回應呢個時代……

(PS 如果你又打算用「大家要記住多讀經、靈修、祈禱、返教會」作結,可以當冇睇過~)

6月12日一群教牧手牽手擋在警察前面保護示威者
圖片來源: https://www.facebook.com/ChanKamShui/photos/a.503741983045963/2269589863127824/?type=3&theater

2014年烏克蘭革命 東正教牧首站在示威者與防暴警察中間祈禱
圖片來源: Sergei Grits/AP/Press Association Images

留下回應

贊助連結
陳韋安洪麗芳 寫給你心中尚未崩壞的地方

 

 

精選文章